RICE PADDY ART ITI ILOCOS NORTE AGRICULTURAL COLLEGE. Napirmaan itay nabiit ti katulagan iti nagbaetan ti Mariano Marcos State University (MMSU), Philippine Rice Research Institute (PhilRice), ken ti Department of Education (DepEd) mainaig iti pannakaaramid ti Rice Paddy Art iti Ilocos Norte Agricultural College (INAC), Pasuquin, Ilocos Norte. Napirmaan ti katulagan kabayatan ti opening program ti Rice Paddy Art Ceremonial Transplanting iti nasao a pagadalan. Daytoy ti kaunaan a rice paddy art a maaramid iti ruar iti MMSU babaen ti pannarabay ti PhilRice. Nairaman kadagiti nakipagpirma iti katulagan da Dr. John C. de Leon, Director ti PhilRice Central Station; Dr. Mary Ann Baradi, OIC-Director ti PhilRice-Batac Branch, Dr. Marilou P. Lucas, Director ti MMSU Extension; Mr. Almer Anatolio B. Ratuita, Principal ti INAC; ken Mr. Jeramel Lincuna, Project Coordinator ti INAC. Mairaman met kadagiti nangsaksi iti panagpirma dagiti pannakabagi ti LGU Pasuquin a da SB Member Ian Valdez ken Municipal Agricultural Officer (MAO) Ms. Diana Rose Dancel; Department of Agriculture Consultant Dr. Santiago R. Obien; Schools Division of Ilocos Norte Superintendent Atty. Donato Balderas Jr.; ti Provincial Government of Ilocos Norte babaen ken ni Ms. Lorna Lubera, ken sumagmamano nga opisial ti barangay. (Ladawan: Richard Guinsatao/Teksto: Mercy R. Gaño)
RICE PADDY ART ITI MMSU-BATAC. Naaramid ti maika-6 a Rice Paddy Art iti Mariano Marcos State University (MMSU), Siudad ti Batac. Kangrunaan a maipakita iti daytoy a tawen ti rupa ni Presidente Ferdinand “Bongbong” Marcos, agraman ti “Bagong Pilipinas” a tagline-na. Naangay ti panagraep idi Agosto 14 iti sango a paset ti MMSU administration building iti panagtitinnulong ti MMSU babaen ken ni MMSU President Dr. Shirley C. Agrupis; Dr. Mary Ann Baradi, OIC Director, PhilRice Batac; City Mayor Albert D. Chua ti Batac; agraman ti Provincial Government of Ilocos Norte iti panangidaulo ni Ilocos Norte Governor Matthew Marcos Manotoc. Nairaman kadagiti nagatendar dagiti dadaulo dagiti nadumaduma nga
ahensia, estudiante ti MMSU-CAFSD a nagraep, ken dagiti agserserbi iti MMSU ken PhilRice a nangiwanwan iti pannakaaramid ti proyekto. Manamnama a makitanton ti ladawan ni Presidente Marcos iti talon, makabulan kalpasan ti panagraep. Itay napan a tawen, ti met ladawan ni Heneral Artemio Ricarte, bannuar nga Ilokano a tubo ti Batac, ti naiparang iti rice paddy art (baba). (Mercy R. Gaño)
(Naipablaak iti Septiembre 16-30, 2023 a bilang ti Bannawag.)
