Tallopulo nga agrarian reform beneficiaries organizations (ARBOs) iti Ilocos Norte ti nakaawat kadagiti abono, makina ken ramit a pagtalon nga aggatad iti P16.531-milion manipud iti Department of Agrarian Reform (DAR). Nairaman kadagiti naited dagiti sumaganad: organic ken inorganic nga abono, four-wheel tractors, brush cutters with harvester, hand tractors, hauling trucks, knapsack sprayers, multi-function tillers/cultivators, multipurpose van, rice reapers, ken water pumps. Mismo a da Regional Director Maria Ana B. Francisco ken Provincial Agrarian Reform Program Officer II Vic M. Ines ti nangidaulo iti pannakaibunong dagiti abono, makina ken ramit a pagtalon kadagiti ARBOs. Sinaksian ni Ilocos Norte Governor Matthew Marcos Manotoc ti panagibunong ti DAR. Iti ladawan, nagtengngaan da Regional Director Maria Ana B. Francisco ken Provincial Agrarian Reform Program Officer II Vic M. Ines ti gobernador. Dimmar-ay met ni Ilocos Norte First District Congressman Sandro A. Marcos (akimbaba a ladawan) iti programa para iti pannakaibunong dagiti dagiti abono, makina, ken ramit a pagtalon kadagiti gunglo dagiti mannalon iti Ilocos Norte. (Jorge Richard P. Guerrero)
(Naipablaak iti Septiembre 1-15, 2023 a bilang ti Bannawag.)
