PINUKPUK, KALINGA. Iti panangrambak ni Fr. Fernold Guadilla Denna, CICM (nakapolo iti puraw) iti maika-25 a tawenna a kas padi. Kaabayna ni Apo Obispo Prudencio Andaya, Jr., CICM, DD a mangiwanwanwan iti Apostolic Vicariate of Tabuk ti Simbaan Katolika. Nakaukkor ti Apo Obispo iti budong a kayatna a sawen ket kalasag, tanda ti panagkakappia dagiti nadumaduma a tribu iti kabambantayan ti Cordillera nangruna iti Kalinga.
Iti akintengnga a ladawan (ngato), makita dagiti adu a papadi a nangsaksi iti panangpabaro ni Fr. Fernold iti karina a kas padi iti sanguanan ti Apo Obispo. Nagserserbi ni Fr. Fernold a misionero idiay Democratic Republic of Congo. Nadutokan a kas Formator iti CICM Theological Seminary iti New Manila, Quezon City, kalpasan ti maysa a tawen a panagsanayna idiay St. Anselm, Rome. Iti akimbaba a ladawan: ni Abraham C. Aquino Jr., mannurat ti Bannawag (akinkanigid), iti idadar-ayna iti panangrambak ni Fr. Fernold iti maika-25 a tawenna a kas padi. Kaduana iti ladawan da (agpakanawan) Apo Obispo Prudencio Andaya, Jr., CICM, DD, Edward A. Dong-as, Odilon Palacay, Marilyn A. Palacay, ken Sr. Sabina Macario, SIHM. Naala ti ladawan iti Sky Ridge Grill and Chill, maysa a nalatak a pagmemeriendaan a pakatannawagan iti nangayed a pakabuklan ti Siudad ti Tabuk.
(Naipablaak iti Septiembre 16-30, 2023 a bilang ti Bannawag.)
