Kas panangrambak iti maika-66 a panagkasangay ni Presidente Ferdinand Marcos Jr. (Septiembre 13), adtoy a maiparipirip ti maysa nga aldaw iti biag ti Presidente.
Mangrugi ti aldaw ni Presidente Marcos iti 6:30 iti agsapa, ket kitaenna ti selponna no adda isyu nga agkasapulan iti atensionna.
Kinuna ni Presidente Marcos a kadawyan a saan a mamigat ta patienna a mangpakired daytoy iti bagina.
Malaksid iti nateng ken ikan a kadawyan nga ipapaunegna, ibilangna pay nga "stress reliever" ti naynay a panagwatwatna.
TURISMO: Intayon Idiay Ayuyang Garden iti Pila, Siudad ti Laoag!
Segun ken ni PBBM, napno ti aldawna iti miting iti Malakanyang maipapan iti nadumaduma nga isyu. Mapagsasaritaanda met dagiti nadumaduma a pasamak, panangipakaammo kadagiti nagapuanan, ken panangamiris kadagiti naaramidan tapno maipanamnama ti kinaannayas ti pannakaipatungpal dagiti proyekto ti gobierno.
Dakkel a paset ti iskediul ni PBBM ti diplomatiko a pagrebbengan ta napateg ti mangbukel iti naimbag a relasion kadagiti gagayyem a pagilian. Kinunana pay a pagayam ti amin a pagilian ti Filipinas.
Adda 50 agingga iti 100 a dokumento a pirpirmaan ni PBBM iti tunggal aldaw. Ngem ti narikrikut ngem iti dakkel a bilang ti dokumento ket 'tay dokumento nga agkasapulan iti pangngeddengna. Uray kasano ti kapuskol ti dokumento, siguraduenna a mabasa ken maadalna a nalaing daytoy sakbay nga ipaulogna ti pangngeddengna.
Mapan a 30 nga awis ti aw-awaten ti Office of the President (OP) iti tunggal aldaw. Nupay kayatna nga atendaran amin dagitoy, makedngan laeng dagiti mabalin nga awatenna gapu iti iskediulna. Agingga iti mabalin, ikkanna iti gundaway dagiti kameng ti media a manginterbiu ken kasaritana dagitoy bayat iti okasion.
Nupay napno ti iskediulna agingga iti Sabado, siguraduen ni PBBM nga adda panawenna iti pamiliana uray iti Domingo laeng.
Iti Domingo, nga ibilangna a "tiempo a para iti pamilia," dumngegda iti misa iti Malakanyang ken mangaldawda a sangakaamaan. Makatulong daytoy kenkuana a mangwaknit iti panunotna.
Kinuna ni Apo Presidente, no sumangbay ti narikut a parikut, adalenna daytoy ken bay-anna iti apagbiit. Inton sublianna, addaanen isuna iti baro a kapanunotan.
Manipud kadagiti miting, dagiti diplomatiko a pagrebbengan agingga iti panangtaming kadagiti papeles -- sumagmamano laeng dagitoy kadagiti pakakumikoman ni Presidente Marcos iti inaldaw.
Ngem pagyamanan ti maika-17 a Presidente ti kinaruay dagiti nasken a tamingenna iti inaldaw, ta kaipapanan daytoy a saan a masaysayang ti orasna.
Kinuna ni PBBM a ti oras laeng ti banag a saan a magatang ken saan a maisubli isu nga iti tunggal aldaw, saanka nga agaramid iti awan kapaypay-anna. (Argyll Cyrus Geducos/Manila Bulletin)
