Lima a tao ti naipadamag a nadangran iti Calayan, Cagayan kalpasan a nadayyeg daytoy ti 6.3-magnitude a ginggined itay Septiembre 12.
Naitudo ti sentro ti ginggined 26 a kilometro iti laud ti Dalupiri Island.
Kinuna ti Office of Civil Defense (OCD) a nadangran dagiti lima a biktima gapu iti narba a diding: tallo kadagitoy ti nasugatan idinto a nadangran ti ulo ti dua nga ubbing a biktima nga agnagan iti Baby Caty, 13, ken Carmela Dela Cruz, 12.
Kinuna ni OCD deputy spokesperson Diego Agustin Mariano nga awan pamilia a nagkamang iti pagbakuitan. Ketdi, namrayan dagiti dadduma a residente ti naturog iti impatakderda a tolda iti ruar ti balayda gapu iti amakda nga adda aftershock.
Manipud Kadagiti Agdama a Kameng ti Bannawag: Dios ti Agngina!
Kinanselar ti gobierno local ti Calayan amin a klase kadagiti pagadalan iti entero nga ili bayat ti panangtingitingda kadagiti naapektaran a pasdek, agraman ti Calayan High School Main a nakadlawanda iti dakkel a birri.
Impakaammo met ti gobierno local ti probinsia ti Ilocos Norte nga awan ti nadadael iti probinsia gapu iti ginggined. (Martin Sadongdong/Manila Bulletin.)
