Kinompirmar ti Commission on Appointments (CA) ita (Septiembre 13) ti ad interim a pannakadutok ni Gilberto “Gibo” Teodoro kas Sekretario ti Department of National Defense (DND).
Kinuna ni Senate President Juan Miguel “Migz” Zubiri, daulo ti CA nga umno unay a tiempo ti pannakadutok ni Teodoro, saan laeng a tapno mangsaranget kadagiti pangta iti seguridad iti uneg ti pagilian, no di ket kangrunaan iti pangta iti ruar idinto nga immirteng ti risiris iti West Philippine Sea (WPS).
Pinatalgedan ni Senate President Pro Tempore Loren Legarda ti akademiko, propesional, ken etikal a kababalin ni Teodoro a nasken nga imet ti mangiwanwan iti seguridad ti pagilian.
Namnamaen ni Senador Jinggoy Ejercito Estrada a daulo ti Senate Committee on National Defense and Security, Peace, Unification and Reconciliation a dakkel a katulonganna ni Teodoro iti panangsangal iti kangrunaan a paglintegan mainaig iti depensa.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Teodoro a nasken ti naing-inget a panangsalaknib iti soberania ti pagilian, ti kalintegan ti Filipinas iti exclusive economic zone (EEZ) daytoy, ken dadduma pay a masakupan ti pagilian ita ta aglulumba dagiti pagilian a mangkutkot kadagiti natural a gameng.
Nagpaay ni Teodoro a sekretario ti DND idi nagakem ni Gloria Macapagal-Arroyo kas Presidente. (Hannah Torregoza/Manila Bulletin.)
