Impakaammo ti Department of Budget and Management (DBM) ita (Septiembre 14) a makaawaten iti Performance-Based Bonus (PBB) dagiti agarup 920,000 a mannursuro iti amin a pagadalan nga adda iti babaen ti Department of Education (DepEd).
Agdagup iti PhP11.6 a bilion para iti Fiscal Year 2021 PBB ti inruaren ti DBM para kadagiti mannursuro ti DepEd.
Naiwarasen ti DBM regional office dagiti Special Allotment Release Orders ken Notice of Cash Allocations iti DepEd para iti FY 2021 PBB. Naitantan ti pannakairuar ti FY 2021 PBB gapu iti kinaadu ti kualipikado nga empleado ti DepEd ken ti kaadu dagiti dokumento a naawatda.
Insubli ti DBM dagiti dokumento nga inted dagiti agpapaay a non-teaching personnel para iti FY 2021 PBB a naggapu iti walo a regional office ti DepEd, gapu iti nadumaduma a parikut kas iti naulit nga entri, biddut nga impormasion iti kabayagen iti serbisio, ken dagiti nagan nga awan iti listaan dagiti empleado ti DepEd. (Xander Dave G. Ceballos)/Manila Bulletin)
