Aganay a PhP11,486,560 a balor ti fertilizer fiscount voucher (FDV) ti naited iti 2,260 a mannalon iti Santa Teresita, Cagayan para iti wet season ti panagtalon iti 2023.
Segun iti Municipal Agriculture Office (MAO), naibunong kadagiti nasao a mannalon dagiti abono a urea ken 14-14-14 a naponduan manipud iti FDV.
Programa ti Department of Agriculture (DA) ti FDV ken sakup ti Rice Competitiveness Enhancement Fund (RCEF) iti babaen ti Rice Tariffication Law.
Kinuna ni Municipal Agriculturist Edwin P. Madrid a dagiti benepisiario a mannalon, isu dagiti nakarehistro iti napabaro a listaan ti Registry System for Basic Sectors in Agriculture (RSBSA) ti DA ken kamkameng kadagiti rice cooperative ken asosasion nga accredited ti DA.
Manipud Kadagiti Agdama a Kameng ti Bannawag: Dios ti Agngina!
Tinawen a maisaysayangkat ti nasao a programa ti RCEF babaen ti suporta ti munisipio nga idauluan ni Mayor Rodrigo P. De Gracia ken iti panangiwanwan ti MAO. Mamindua a daras a maited ti FDV kadagiti mannalon para iti dry season ken wet season. (Edison B. Tobias)
