Marugianen ti debate iti plenario para iti PhP5.768-trilion a General Appropriations Bill (GAB) ti 2024 kalpasan nga inaprobaran ti House Committee on Appropriations itay bigat (Septiembre 14) ti iskediul ti panagtataripnongda.
Kinuna ni Marikina City 2nd district Rep. Stella Quimbo, mangrugi ti debate iti Kamara inton Septiembre 19, ket namnamaenda a maaprobaran ti gakat iti maikatlo a pannakaibasa daytoy inton Septiembre 27.
Ti GAB, a linaon ti House Bill (HB) No.8980, ket naibasar iti 2024 National Expenditure Program (NEP) nga indatag ti Department of Budget and Management (DBM) iti Kamara itay napalabas a bulan.
Kinuna ni Quimbo nga adda sumagmamano a nabaliwan iti 2024 NEP, ngem ad-adu ti saan a nabaliwan kas iti confidential fund iti gakat a national budget. (Ellson Quismoro/Manila Bulletin.)
