Nobela ni ARIEL SOTELO TABÁG
(Grantee, 2013 National Book Development Trust Fund para iti Nobela nga Ilokano)
3 | TUMATAYAB NGA AWANAN PAYAK
UNLICALL. Unlitext. 24/7. Gising 24 oras. Dahil hindi natutulog ang tagapagbalita. On-call. Call center agent.
Dagita ti masansan a yawag ni Eliezer ken ni papangna no kasta nga ikissiimna ken ni mamangna ti kinaestrikto daytoy. Adda dagidi tiempo ti kinaubingna a kabaelanna pay laeng nga ibaga a sangonsango ken ni papangna dagita. A pamrayan la daytoy ti umisem iti bangbangir.
Di malagip ni Eliezer no kaano a nagsardeng nga ibagana a sangonsango. Nalabit idi rugiannan nga ikissiim ken ni mamangna. Wenno idi ingaretngetna lattan iti unegna ti suronna ken ni papangna.
Ngem iti makalawas a kaawan ni papangna, kasla metten imahe iti monitor a naikadakkel ket nakalawlawagen a makitana dagiti kababalin ni papangna nga inyar-aramidanna iti birngas. Ita, nakalawlawagen nga awanda. Nakalawlawagen a sapsapulenna.
TURISMO: Intayon Idiay Ayuyang Garden iti Pila, Siudad ti Laoag!
Iti amin nga aramidenna, malagipna ni papangna gapu ta iti amin nga inar-aramidna, adda latta dita a mangtarabay kenkuana. No makain-inumen iti Milo. No agdigos. No agay-ayam iti kompiuter. No agbuya iti telebision. No agaramid iti assignment. No mapan agbasketbol.
“Dimo unay ispoilden,” masansan a madarimusmosanna nga ibagbaga ni mamangna ken ni papangna. Isem latta met no kua ti sungbat ni papangna.
Kasla Supermary a talaga, kunkuna la ket ngarud no kua ni Eliezer iti bagina, ta awan met dulianan daytoy iti nasao nga ikan nga ama ni Nemo a nakaes-estrikto ken awan ti panagtalekna iti kabaelan ti anakna. No kasta a rummuarda, sangkapetpet ni papangna ti imana a kasla mabuteng la unay a mapukawna.
ITI DAYTOY MAKALAWAS A KAAWAN ni papangna, isu met ti pannakaamiris ni Eliezer iti kabassit ti ammona ken ni papangna.
Ta no kasta nga agsaludsod maipanggep iti probinsia daytoy wenno pamiliana, sangkakunana met iti Ingles: “Saan a napateg ti naggapuam, ketdi ti pagbalinam.” Kasla dialogue ni Papa Smurf ken ni Smurfette iti The Smurfs, 2. Isu a para ken ni Eliezer, ad-adda a balakad para kenkuana dayta ngem ti pamalpalatpatan iti katatao ni papangna.
Domingo Adviento. Mapan a 5’2” ti tayagna. Atiddog ti napinggol a buokna a nasilap a nangisit. Kayumanggi ti kudilna a gistayan nangisit. Kullapit. Asideg a kalanglangana ni Tado Jimenez. Di maun-uni. 35 anios. Pebrero 7, 1978 ti birthday-na. Naka-Levi’s 501 ken nakakamiseta iti nangisit nga adda rupa ni Eric Clapton.
Dagita ti nagtipon nga ammoda ken Teacher Tere maipanggep ken ni papangna. A mabalin met nga isu ti ammo dagiti kakaarrubada. Wenno dagiti pada daytoy a para sukon iti eskuelaanda.
Sumangkamaysa met ni mamangna no kasta a damagenna ti maipanggep ken ni papangna. Kuna daytoy: Rocker. The best father in the whole wide world.
A pamrayan a pagkatawaan ni papangna iti nalag-an. No kasta nga agkusay wenno aganil-il ni Eliezer, inayon ni mamangna: Ul-ulila. Taga-Vigan. Lugar dagiti duogan a balbalay ken tattao.
Ul-ulila. Taga-Vigan. Duogan a tattao.
Ken ni Eliezer, no kabaelanna la koma ti agbiahe nga is-isuna, sinawarnan dayta a Vigan. Napetpetanna ti kuentas nga inted ni papangna ket makaluasit ta makaluasit manen.
RINEYPKO, MASANSAN A KUNA NI MAMANGNA kadagiti barkada daytoy no kasta nga umayda dumaw-as iti kaserada ket saludsoden dagitoy no ania ti nagustuan ni mamangna ken ni papangna— no kasta a mairana nga awan ni papangna wenno binaonda a napan gimmatang iti pagsasanguanda a serbesa wenno tsitsiria. Sagpaminsan, saan nga usaren ni Eliezer ti headset bayat ti panagay-ayamna iti kompiuter ket mangngegna ti saritaan da mamangna.
Kasla Tado Jimenez, kuna pay ti maysa. Yaiks!
Dakota naman, kuna met nga ikatawa ni mamangna. Ket agkakatawada.
Isu ti pannakaamiris ni Eliezer a saan laeng a ti titserna iti Grade 6 ti nakaipatarus a kalanglanga ni Tado ni papangna. Talaga a daytoy ti makita ti kaaduan.
Ngem inton sumangpet ni papangna, kuna ni mamangna bayat ti panangkalkallabayna ken ni papangna a dimo maawatan no agdumog wenno agkudkod wenno agrungiit: Puera angaw. Isu a pinilik ta siguradok nga awan ti kainnagawko!
Ket agpapaggaak da mamang ni Eliezer ken ti barkada daytoy. Ni papangna, pamrayanna laeng man metten ti umisem no kua.
Ammo ni Eliezer a maitured ni mamangna nga angawen iti kasta gapu ta no kasta nga is-isuda, masansan nga isapata ni mamangna ti panagayatna ken ni papangna. Malagipna la ket ngarud no kua ni Eliezer ti kadaanan a kanta a mangmangngegna a patpatokaren ni mamangna: If love is blind, I find my way with you…
IDI MAKAAWIDDA KALPASAN A NAGPUKAW ni papangna, kalpasan a nagpatangda iti telepono ken mamangna ken kalpasan nga inulit-ulitna a pinadas a tinawagan ti selpon ni papangna a nagbanag a toot-toot, linuktan ni Eliezer ti laptop. Napan iti account-na iti Facebok ket kinitana ti account ni papangna.
Iti search box, intipana ti Domingo Adviento. Awan. Adda ketdi nagparang a Love Joy Domingo Adviento. Account ti maysa a babai. Impapanna a Love Joy ti nagan ti babai, Domingo ti apeliedo ti ina daytoy idinto nga Adviento ti apeliedo ti ama daytoy. Awan ti Domingo Adviento. Awanen ti FB ni papangna. Wen, uray iti FB, awanen ni papangna.
I-message-na koma wenno i-friend-na pay ketdi koma daytoy Love Joy Domingo Adviento ngem nalagipna met ti masansan a patigmaan dagiti dadakkelna a saan a bastabasta makigayyem iti FB ta agkaiwaran dagiti manglokloko— ibagada a kabagiandaka wenno am-ammoda ti dadakkelmo ngem lokuendaka met la gayam. Namak payen no kasta daytoy a babai?
Nabayag a nagmalmalanga ni Eliezer. No awanen ti FB ni papangna, kayatna a sawen, inikkatna daytoy. Kayatna a sawen, nairanta ti panagpukaw ni papangna. Saan a napukaw. Inrantana ti nagpukaw. Ngem apay?
Saan a nagawidan ni Eliezer ti panagluana.
Nagpupok iti kuartona. Kalpasan ti panagsasaibbekna manen, nalagipna a ginuyod iti sirok ti katreda ti bass guitar ni papangna. Linuktanna ket mail-iliwan a nangapros iti kayumanggi a gitara a kunam la no ni papangna mismo daytoy. Pinunasna babaen ti dakulap ken ramramayna dagiti kimpet a tapok.
Adda dua nga sticker iti ngatuen ken babaen dagiti kuerdas: iti akinngato, nagtimbukel a nagsumbangir a kasla ulo ti dua a kabalio— puraw ken nangisit a ti puraw, nagmata iti nangisit idinto a ti nangisit, nagmata iti puraw; idinto nga iti babaen dagiti kuerdas, sticker a lettering a Black Stallion nga isu ti nagan ti banda ni papangna. Dita a nalagipna dagiti kabanda ni papangna.
Sinaggaysana a pinadas a kinontak dagiti kakadua ni papangna iti banda ngem agpapada dagitoy a naklaat, ken nangibaga nga awan ti pamalpalatpatanda iti panagpukaw ni Dadi Dom. Nadlaw pay ketdi ni Eliezer iti tono dagitoy a kas kadagiti polis, impatarus dagitoy a nagpukaw ni papangna gapu iti babai. Sabagay, isunanto pay mismo a putot ni papangna, awan ti pangarikapanna no ania ti pudno a napasamak, dagitoyto la ketdin saan a kadaraan ni papangna? Sa maysa, no kasano kabayagna nga awan ni mamangna, kasta metten ti kabayagna a di nagpakpakita ni papangna kadakuada ta no saan a mariro, paset ti kari ni papangna a saanen a makibanda ket ipamaysan daytoy ti mangbantay kenkuana. A ngem awan metten.
Pinadasna a kinutingting dagiti uppat a kuerdas ti elektroniko a baho. Ngem kasla awan ti mamaayna ta malaksid a di aguni gapu ta saan a nakasaksak, awan ti pamalpalatpatanna no kasano a tugkelan ken kalbiten dagiti kuerdas.
Rimmuar met laeng idi agangay ket linuktanna manen ti desktop a kompiuter. Linuktanna ti Father Files a folder. Ngem kaaduan a pelikula a nagum-umaandan a binuya a pakairamanan ti Finding Nemo ken kankanta ti nagyanna. Linuktanna ti folder a Musika. Adda dua a folder— Blues ken Halohalo Rakenrol. Linuktanna ti Blues ket nakitana dagiti folder a Bob Bylan, BB King, Elvis Presley, Blind Lemon, Derek Trucks, Dr. Crowley, Eric Clapton, Etta Baker, Fat Domino, Janis Joplin, Jefferson, Jimi Hendrix, Johnny Lang, Howlin Wolf, Kenny Wayne, Muddy Waters, Ray Charles, Robert Johnson, Samuel Jackson, Son House, Stevie Ray Vaughn, The Jerks.
Nagkuretret ti mugingna. Manmano ti am-ammona kadagitoy.
Naawis ti imatangna iti Samuel Jackson. Singer gayam, nakunana iti nakemna. Malagipna ti pelikula a Django Unchained a nakairamanan daytoy kas kangrunaan nga adipen ni Leonardo DiCaprio. Linuktanna ti folder. Adda dua a kanta. Insullatna iti lapayagna ti headset ket pinis-itna ti Stackolee. Nagparang iti screen ti music from the motion picture Black Snake Moan. Soundtrack gayam. Ngem dina pay nabuya daytoy a pelikula.
Naglaok a rap ken makapakompas a togtog ti gitara ken drums.
Pinis-itna ti Just Like A Bird Without A Feather. Naliday ti pannakakalbit ti gitara— gagangay a mariknana kadagiti nabannayat a blues no kasta nga agpatokar ni papangna. No makangngeg iti kasta a nabannayat a blues, malagipna ti komersial ti Marlboro a ni Marlboro man, inalsaan daytoy ti kabalio ket imparngedna iti puon ti kayo iti tuktok ti bantay nga an-anaraaran ti lumneken nga init. Nagtugaw iti sirok ti kayo ni Marlboro man ket kinalbitna ti gitara, kas iti pannakakalbit ti gitara iti kanta ni Samuel Jackson:
Like a bird without a feather/ You know I’m lost without your love.
ITI SIROK TI KATRE NI PAPANGNA, nabukitkitan ni Eliezer ti koleksion daytoy a libro ken magasin nga Ilokano. Nagdudukotanna a binasabasa. Napia laeng a pakaasaan ti sangkabassit nga ammona iti lengguahe ni papangna.
Matarusanna met ketdi. Ngem marigatan a mangbasa. Husto ti pasaray mangngegna a komento a sao ti billit ti lengguahe ni papangna. Para kenkuana, kasla ketdi sao ti Intsik.
Nabukitkitanna pay ti enbelop nga ayan dagiti ladawan, a cutouts kadagiti diario, dagiti nadumaduma nga aktibidad ti kabalio. Nagkintayeg idi makitana ti dua a kabalio—agang-angatda!
No kua, kutingtingenna met ti baho ni papangna. Kinitana iti Youtube no kasano a tokaren.
Du-dum! Du-dum!
Naganasan iti nabangag a nabileg nga aweng a manggunggon iti bagi ken sumnek iti kaunggan.
Du-dum, du-dum, du-dum, du-dum
Du-dum, du-dum, du-dum, du-du-du-dum!
Immisem.
Du-dum, du-dum, du-dum, du-dum
Du-dum, du-dum, du-dum, du-du-du-dum!
Rakenrol!
SUMAGMAMANO NGA ALDAW MET TI NAGLABAS sipud nagpukaw ni papangna sa naamiris ni Eliezer a mailiw metten ken ni Isabela a pusa ni papangna. Segun ken ni mamangna, taraken daytoyen ni papangna sakbay pay a nagam-ammoda.
Adu ngarud ti masmasdaaw a napaut man ti biag ni Isabela. Sabagay, naammuan ni Eliezer iti klasena iti Biolohia a kadagiti umuna a dua a tawen ti pusa, agtawen daytoy iti 25. Sa kalpasanna, kada tawen iti tao ket kapada ti uppat a tawen iti pusa. No maabot ti tao ti nasurok a sangagasut a tawen, mabalin met nga aboten ti pusa ti uray 15 agingga iti 20 a tawen.
Malaksid a naannad daytoy a pusa ni papangna, saan a naruar ken di met nagarawigaw.
Kailiwna ni Isabela. Ta no kasta a gantilenna daytoy, saan nga umas-asideg ni papangna kenkuana. Saan a sirip a sirip iti ayanna wenno damag a damag iti ar-aramidenna. Isu a pagaayatna metten a gantilen ni Isabela iti laksid a di tumutop daytoy tapno laeng ag-break met ni papangna iti kina-24/7 daytoy.
Mapampanunot ni Eliezer a nalabit talaga nga intugot ni papangna ti pusa ket napandan iti adayo. Amangan no addan sabali a pagtaengan ni papangna. Sabali nga adayo a pagtaengan. Ta no asideg laeng, amangan no nakasubli koma ni Isabela.
Nagsenaay.
ITI KAALDAWAN TI MAIKASANGAPULO ket dua a panagkasangayna, nasapa a nakariing ni Eliezer.
Wenno nasapa a natarimbangon. Natagtagainepna manen ti puraw a lakay a kaing-ingas ni Gandalf isu a pinanagannana pay ketdin iti Gandalf. Kas iti daydi tagainepna iti umuna a rabii ti panagpukaw ni papangna, kasdiay man met laengen ti tagainepna. Naidumduma kadagiti tagainepna, nakapatpatak daytoy a kasla pudno a napasamak. Kasla 3D koma no sine. Agarup napasamak iti sangona, wenno iti pay ketdi uneg ti utekna.
Kas iti sigud, binallaagan ni Gandalf nga agannad koma ta adu kano ti monster. Wen, dayta nga Ingles a balikas ti inusarna. Nupay adda kano met dagiti knights-na, agannad kano latta. Ken itultuloyna ti agbalin a nasingpet.
Iti daytoy a gundaway, nakapagsaon ni Eliezer. “Opo,” kinunana. Tagalog dayta. Barbareng no naawatan ni Gandalf.
Ngem idi saludsodenna koman no ayan ni papangna, saan metten a makauni. Kasla simkil ti dilana. Wenno nagpukaw pay ketdi. Kasla ti bagina ti simkil bayat ti panaglumen ti ladawan ni Gandalf a kasla ladawan iti Photoshop a nausar ti clone stamp tool nga in-inut a napukaw idinto a naisukat ti adda iti background a kabakiran. Agingga nga addan ni Eliezer iti kaunggan ti maysa a kabakiran— iti lawlaw dagiti nagdadakkel a kaykayo.
Idi padasenna ti lumusot iti nagbabaetan dagiti kayo, dina met mabaelan. Kasla nagrerekket met dagiti kaykayo a kasla saan met a kaykayo no di ket sementado a diding ti napinturaan laeng iti maris ti kaykayo.
Iti pettat nga iseseppeg ti lagaw, isu ti pannakatarimbangon ni Eliezer.
Bayagna la a nakariing, nariknana a lam-eken. Nagpaypayegpeg. Ngem nadlawna met a nagkalkalimduosan. Lamminen a baraen.
Bimmangon iti katre. Nalabsanna iti salas a nakaidda da lilang ken ti ulitegna. Nagin-inayad. Dina kayat a mariinganda ti itsurana. Dina kayat a tulonganda isuna. Wenno nakairuamanna a di matulongan no kasta nga adda nasakitna? Wen ta iti laksid ti naynay a panangbambantay ni papangna kenkuana, dina napuotan nga inasikaso daytoy no kasta nga agsakit. Di man la pulos apirasen daytoy ti mugingna no kasta nga aggurigor.
Inka uminum ti danum. Inka alaen ‘diay agas iti medicine cabinet. Dikanton agkalkalintuduan. Kanayon nga ipanmo ta labakara iti bukotmo. Agan-annadka.
Dagita ti masansan nga ibaga ni papangna. Uray no kasta a maitibkol wenno maitim-og, saan a tulongan ni papangna. Ni mamangna ti awaganto pay laeng ni papangna a mangtulong kenkuana.
Weird, nakuna ni Eliezer iti bagina. Super weird, nakunana met idi nalagipna ti pettat a panagpukaw ni tatangna. Kasla magic. Kasla adda magician a nangpitik kadagiti ramayna— poof! Awanen ni tatangna. Super weird.
Nangala iti danum iti water jug. Saan nga iti ref ta sangkapalagip ni papangna a di umin-inum iti nalamiis no kasta a madi ti marikriknana.
Apagapaman a napukaw ti pannakailana ken ni papangna iti nalagipna. Uray kaskasano, nakapagsagana a mangestimar iti bukodna a bagi.
Nabang-aran idi nakainum iti lima a baso a danum. ‘Tay kunada iti Tagalog a parang nagdahilan lang.
Nagsubli iti katre ngem saanen a nagtuglep. Nakapatpatak iti panunotna ti tagainepna. Ania ngata ti ipasimudaag daytoy? Uray iti tagainepna, mapukpukaw latta met ni papangna. Impagarupna a mabalin a pilien ti matagtagainep. Kasla koma no adda kayatna nga ay-ayam, no kua, matagtagainepna met. Wenno no adda salipna iti Math iti eskuela, matagtagainepna met no kua a makisalsalip wenno makakita kadagiti adu a numero.
Timman-aw iti ruar. Mangrugin nga aglawag. Naglaok a nangisit ken asul ti tangatang. Martes ita ngem nagpakada iti titserna idi kalman a saanen a sumrek. Sigurado la ketdi a kablaawan dagiti kaklasena. Saan a gapu ta dinawatna ken ni mamangna a didan agrambak no di ket dina ammo ti reaksionna inton kablaawan da titserna ken dagiti kaklasena. Maragsakan? Kasano koma a maragsakan no ammo metten dagiti kaklasena a pinanawan isuna ni papangna?
Idi makabangon da lilang ken ti ulitegna, pinidutna ti remote control ti telebision ket pinagsinsinnublatna nga impan iti Umagang Kay Ganda ti ABS-CBN ken Unang Hirit ti GMA7. Kastoyen ti aramidna manipud nagpukaw ni papangna. Mangnamnama nga uray kaskasano, adda la koma met makadakamat uray no nasarakandan a natay ni papangna no isu— yad-adayo ni Apo! Kinapudnona, pinadasda ti nagpanawagan iti radio ken nagpaipablakda iti diario. Ni ulitegna ti nangasikaso kadagitoy. Ngem rumanasaw idi simmangpet ta timmayab kano ti sangapulo ribu idinto a maminsan nga aldaw laeng a dirediretso a maipanawagan iti DZRH ken maminsan laeng a maipablaak ti ladawan ni papangna iti tabloid a Balita. Pabasolen pay ketdi ti ulitegna ni lilangna a ti la kano napampanunotna a paggastuan. Sa indukit daytoy nga amangan no pudno ti kuna dagiti polis a simmurot laeng iti babaina.
Nakarkaron a tinagingina ti ulitegna, agraman ni mamangna, ti agpanawagan iti telebision. Manmano pay ketdi ti maikasta iti telebision— no nalatak laeng isu. Isu a daytoy panagbuybuyana, inanama pay ketdin nga adda napasamak a dakes ken ni papangna ket makitana iti telebision. Isu a kasla bagtit nga agur-uray iti awan. Kasla awan aniamanna nga umagibas iti imatangna dagiti agkikinnatawa a host; kasla gagangay nga anasaas ti angin ti panagdengngnegna kadagiti katkatawa ken agkakamakam a panagsao dagiti host.
Iniddep ni Eliezer ti telebision.
Idi makapamigatda, impakadana ti iruruarna. “Innak la agpagnapagna, lilang,” kinunana iti Tagalog. Simmirip iti ruar. Nadlawna nga agar-arbis. Ngem nakalawlawag met ti aglawlaw. Agin-init, agtudtudo.
“Papanam?” sinaludsod ni lilangna. “Bertdeymo sa rummuarka. No adda mapasamakmo, a.”
“Dita laeng, lilang,” insungona ti UP campus a kasinnango laeng ti subdibision nga ayanda. Masansan a dita ti mapanda pagpallailangan kada papang ken mamangna no kasta a weekend— idi saan pay a nagabrod ni mamangna; idi saan pay a nagpukaw ni papangna.
“Umaynaka kuyogen ni angkelmo,” kinuna ni lilangna.
“Mabiitak laeng, lilang.” Alisto ti sungbatna.
Timman-aw ni lilangna. “Ne, ket agin-init, agtudtudo,” kinuna daytoy a nagmulagat. “Adda padaya dagiti tikbalang! Aysus, no ket makarkarmaka!”
“Adu la amin,” kinuna met ti ulitegna nga immasideg ken ni lilangna. “Pammati dagiti duogan a tattao!”
“Nagsao met ni daytoy baro a tao,” kinuna ni lilangna a nangkusilap iti ulitegna. “Mangalaka ngarud iti payong,” kinuna daytoy a nangtaliaw ken ni Eliezer. “No ket igurigormo ‘ta arbisna!”
Linukib ni Eliezer ti likudan ti bulong ti ridaw nga ayan dagiti payong. Pinidutna ti nalabaga a namarkaan iti McDo.
“Dayta nangisit ti alaem. Makimatka kadayta nalabaga,” kinuna ni lilangna.
“Ayna!” Nagsanamtek ti ulitegna a napan iti sango ti telebision ket biniagna daytoy. “Old school never grows old!”
Napangilangil ni Eliezer iti diar ti ulitegna. Dina masinunuo no pilosopo ti awag iti kasta.
Innalana ti nangisit a payong.
Apagruarna, nariknana ti panagsubli ti nariknana iti parbangon. Lamminen a baraen. Nalagipna ti leksionda iti siensia. Impapanna a gapu ta espesial nga aldawna daytoy, mabalin a na-excite unay ti pisikal a bagina nga isu met ti nakaigapuan ti reaksionna iti aglawlawna. Wenno mabalin a gapu iti tagainepna.
Inyaleng-alengna ti arintrangkasuen a marikriknana ket nagturongen iti UP campus.
Naisangsangayan ti kinaulimek ti campus idi makastrek. Nupay adda dagiti manglabas ken masabatna nga estudiante, panagriknana ket adda bukod a lubong ti tunggal maysa. Isuna, ti bukodna a lubong, ti lubongda kada mamang ken papangna ti pampanunotenna. Dagiti estudiante, pampanunotenda ti klaseda. Kasta met dagiti propesor. Dagiti drayber. Dagiti guardia. Pampanunotenda ti trabahoda ken bukodda a biag.
Idinto a dagiti kayo, nakamattiderda. Dida agkutkuti a maisupadi iti pannakakumikom dagiti tattao.
Panagrikna ni Eliezer, ti laeng arbis ken ti lawag ti init ti nagtulag nga agkanaig iti lubongda— agin-init, agtudtudo.
Pagam-ammuan, nakastreken dagiti estudiante ken propesor kadagiti klaseda. Nakapanaw metten dagiti dyip ken taksi— nakapandan iti pagturonganda. Idinto nga isuna, tinangadna dagiti kayo a mangrugin nga agindayon dagiti bulongda. Wenno dagiti sangada ti agin-indayon?
Ti arbis, nagbalinen a tudo sa bayakabak. Ngem ad-adda met nga imbullad ni Apo Init. Pagam-ammuan, naggurruod.
Nagtaray a nagkamang iti sirok ti maysa a kayo a masansan a pangyaplagan ni mamangna iti ikamen ket pagiladanda a tallo nga awagan ni papangna iti “kasla ladawan iti akkub ti Watchtower a babasaen dagiti Saksi ni Jehovah.” Maysa daytoy a kayo kadagiti naipalikmut a mangtan-aw iti sunken garden. Naisabsabali a kayo. Adda met kastoy a kayo iti sango ti subdibisionda. No di mariro, kallupit ti inyawag ni papangna— kalumpit, kuna daytoy, iti Tagalog.
Impigpigsanan ti bayakabak. Sa kas kadagiti dadduma pay a kaykayo, ad-adda metten ti panagindayon dagiti sanga ti kallupit. Naginnagawen ti sipnget ken lawag.
Naggurruod manen. Sa nagkimat.
Sa naminpinsan a nagsipnget ti lubong ni Eliezer.
>> Napalabas a paspaset: 1 | 2
