Impanamnama ni Presidente Ferdinand Marcos Jr. kadagiti ganggannaet a dadaulo ti negosio a dagiti propesional a manedier ti mangimaton iti Maharlika Investment Fund (MIF) ta mapaay daytoy a gandat no politiko ti mangituray.

Iti panangallukoy na kadagiti dadaulo ti negosio a dimmar-ay iti 10th Asia Summit iti Singapore itay Septiembre 13, kinuna ni Marcos a saan a ti gobierno ti Filipinas ti mangimaton iti MIF tapno agtalinaed daytoy nga agwaywayas iti pinansial nga operasionna ken panangsangal-linteg tapno masinunuo ti panagballigina.

Kinunana pay a no adda mairaman a politiko iti MIF, dagiti pangngeddeng ket saanen a pasig a para pinansial, ken saan a nasayaat ti pannakaimaton daytoy.

Imbinglay ni Presidente Marcos dagiti mabalin a maipuonan dagiti ganggannaet a kapitalista mainaig iti umuna a sovereign wealth fund ti Filipinas, kas ti impraestruktura, panangparnuay iti enerhia, ken agrikultura. (Argyll Cyrus Geducos/Manila Bulletin.)