Marigatan pay laeng dagiti agdama a modelo ti artificial intelligence (AI) nga us-usaren dagiti chatbot ken dadduma pay nga app, a makabigbig iti nagdumaan ti awan kaes-eskanna a patang ken ti natural a lengguahe (ti tao), segun iti resulta ti maysa a naiwayat a panagadal a naipablaak iti journal a Nature Machine Intelligence.
Kuna dagiti agsuksukisok iti Columbia University iti Estados Unidos nga impalgak ti insayangkatda a panagadal dagiti limitasion dagiti agdama a modelo ti AI ket segun kadakuada, nasapa pay la unay tapno mapalubosan dagitoy a modelo a maaramat iti legal wenno medikal a pakaseknan.
Sinubok dagiti agsuksukisok nga inikkan iti ginasut a paris dagiti patang (sentences) ti 9 a modelo ti AI ket sinaludsodda kadagitoy no ania kadagiti patang ti mabalin a maawatan iti inaldaw-aldaw a panagsasao.
Kalpasanna, nagsaludsodda met iti 100 a tattao no ania ti makuna dagitoy kadagiti isu met laeng a paris dagiti patang.
TURISMO: Intayon Idiay Ayuyang Garden iti Pila, Siudad ti Laoag!
Iti resulta ti naamiris a sungbat dagiti AI ken sungbat dagiti tao, natakuatan ti dakkel a pagdudumaan.
Kaaduanna a pumadpad iti sungbat dagiti tao ti sungbat dagiti sopistikado a modelo a kas iti GPT-2, maysa kadagiti immuna a version ti nalatak a chatbot a ChatGPT.
Ngem saan a nakapatar ti dadduma a modelo.
Nupay kasta, imbatad dagiti agsuksukisok nga adda nagbiddutan amin a nasubok a modelo.
"Adda pagkapsutan ti tunggal modelo, kas koma iti panagbiddutda a mangibaga nga addaan kaipapanan ti sumagmamano a patang a patien dagiti partisipante a tao nga awan kaes-eskanna a sasao (gibberish)," kinuna ni Christopher Baldassano, psychology professor ken autor ti naipablaak a resulta ti panagadal.
Innayon pay ni Baldassano a "makaanay koma dayta a banag tapno saantayo pay la unay a pagtalkan ita ti kabalinan a kayattayo a magteng dagiti sistema ti AI iti panangbukel kadagiti importante a desision."
Kinuna met ni Tal Golan, maysa kadagiti autor ti panagadal, a "makapagagar ti teknolohia dagiti modelo ti AI a mangsupusop iti kinaproduktibo ti tao."
Nupay kasta, kinuna met la ni Golan a mabalin a "nasapa pay unay a mapalugodan dagitoy a modelo a mangsukat iti panagdesision ti tao kadagiti tay-ak a kas iti linteg (law), medisina, wenno panangtingiting kadagiti estudiante."
Naglatak dagiti modelo ti AI gapu iti pannnakairuar ti ChatGPT itay napan a tawen. Nabaelan payen ti ChatGPT nga impasa ti agduduma nga eksaminasion (kas iti bar) ken mapapati a kabaelanna ti agbalin a katulongan dagiti doktor, abogado, ken dadduma pay a propesional. (Manila Bulletin/ AGENCE FRANCE-PRESSE)
