Saan a nababbaba ngem 3 a pagsurbey a barko ti China ti nasaripatpatan iti akindaya a paset ti Philippine Sea, segun iti ladawan ti mapa nga impakita ti maysa nga eksperto iti seguridad iti baybay itay Septiembre 15.
Segun ken ni Ray Powell, project director ti Gordian Knot Center for National Security Innovation ti Stanford University, dagiti nasaripatpatan a barko ti China nga adda iti exclusive economic zone (EEZ) ti Filipinas ket “Haiyang Dizhi 12 Hao”, “Haiyang Dizhi Jiuhao”, ken “Song Hang”.
Naipakita iti ladawan ti mapa a mangwanwanawan iti panagtignay dagiti barko, adda dagiti nasao a barko iti asideg ti Philippine Rise, maysa a tanap iti uneg ti baybay iti amianan a daya ti Filipinas a mapapati a nabaknang iti lana, gas ken natural a kinabaknang ti baybay.
Sakbay daytoy, kinuna ni National Task Force for West Philippine Sea (NTF-WPS) spokesperson ken National Security Council (NSC) Deputy Director General Jonathan Malaya a nakaawatda iti report nga adda barko ti China nga agdakdakiwas iti daya a paset ti Philipine Sea, malaksid pay iti pangen dagiti Chinese coast guard, navy, ken maritime militia vessel a naiwaras iti West Philippine Sea.
Manipud Kadagiti Agdama a Kameng ti Bannawag: Dios ti Agngina!
Kinumpirma ni Col. Medel Aguilar, pannakangiwat ti Armed Forces of the Philippines (AFP), dagiti naawatda a report.
Kinuna met ni Commodore Jay Tarriela, pannakangiwat ti Philippine Coast Guard (PCG) iti West Philippine Sea, a sititibker latta ti PCG iti pannakaikumitna a mangsalaknib iti baybay ti Filipinas, agraman ti EEZ daytoy nupay limitado laeng ti kabaelanda. (Martin Sadongdong/Manila Bulletin.)
