Insingasing ti Philippine Anti-Organized Crime Commission (PAOCC) ti pannakaproseso ti pannakabigbig iti rupa (face recognition) iti pannakairehistro dagiti SIM (Subscriber Identity Module) cards ta saan a makaanay dagiti agdama nga annuroten tapno malabanan ti text spams ken scams.
Segun ken ni PAOCC Executive Director Gilbert Cruz, adda dagiti kaso nga uray no cartoon characters laeng ti mausar iti proseso ti panagrehistro, akseptaren daytoy ti SIM registration system dagiti kompania ti telepono.
"No kasapulan ti face to face a panagrehistro tapno ma-screen amin dagiti agirerehistro iti SIM cards, ngarud, masapul a maaramid," kinuna ni Cruz.
Malaksid iti face recognition, insingasing pay ni Cruz a saanen nga usaren dagiti kompania ti telepono ti nasao a system ket mangipanda laengen iti grupo ti tattao iti proseso ti panangberipikar kadagiti agrehistro iti SIM cards.
BROADCAST MEDIA: Asino ni Shalimar?
"Narikrikut laeng ti proseso ti manual a panangberipikar ngem masigurado met ti nainget ken umno a proseso ti screening," kinuna pay ni Cruz.
Imbunannag ni Cruz dagitoy a pakaseknan iti baet ti panagraira pay latta ti pannakailaklako dagiti SIM card a maus-usar iti online scams ken dadduma pay a cybercrimes.
Kinuna ni Cruz nga iti nabiit pay a panagimbestigar dagiti autoridad kadagiti establisiemento ti POGO (Philippine Offshore Gaming Operators), nakakompiskarda iti pinullo a ribu a rehistrado a SIM cards. Segun ken ni Cruz, ipaduyakyak ti kaadda dagitoy a rinibu a SIM cards kadagiti establisimiento ti POGO no ania ti pakaus-usaran dagitoy a SIM cards.
Maysa pay a singasing nga aramiden ti PAOCC, segun ken ni Cruz, ket ti pannakarepaso amin a nairehistron a SIM cards. (AARON RECUENCO/ Manila Bulletin)
