Kiniddaw ni Senator Alan Peter Cayetano iti National Telecommunications Commission (NTC) itay Septiembre 15, a mapasayaat pay koma ti proseso ken mangitungpal iti naing-inget a wagas para ti pannakairehistro ti SIM card, imbes nga isardengda daytoy.
Kinuna ni Sen. Cayetano a saan nga isardeng, ngem ingetanda ketdi ti proseso ti panagrehistro ta ad-adda nga agraira dagiti iskamer no saan a mairehistro dagiti SIM card.
Kinuna daytoy ni Cayetano kalpasan nga insingasing ti Presidential Anti-Organized Crime Commission (PAOCC) a maisardeng pay laeng ti SIM card registration gapu ta mapalusposan ti online registration system dagiti peke nga ID ken impormasion.
Segun iti imbutaktak dagiti kameng ti Cybercrime Division ti National Bureau of Investigation (NBI) a nangsubok iti online SIM card registration system, nabaelanda nga irehistro ti maysa a SIM card uray retrato ti sunggo ti inusarda.
Manipud Kadagiti Agdama a Kameng ti Bannawag: Dios ti Agngina!
Dinagdag ni Cayetano ti NTC a makitunos daytoy iti dadduma nga ahensia kas iti Philippine National Police (PNP) ken ti Department of Information Communication Technology (DICT) a naaddaanen iti napadas ken nasubok nga online system.
Insingasing pay ni Cayetano a maitipon koma dagiti datos ti SIM registration iti National ID System tapno mapagtalkan ken nabibiit ti pannakaberipikar dagiti impormasion. (Hannah Torregoza/Manila Bulletin.)
