Aglangan ni Presidente Ferdinand Marcos Jr. iti United Nations (UN) General Assembly a maangay iti UN Headquarters iti New York, USA ita a tawen, ngem awan ti impakaammo ti Department of Foreign Affairs (DFA) a rason iti panaglangan ni Presidente Marcos iti panagtataripnong dagiti papangulo ti lubong.
Ni DFA Secretary Enrique Manalo ti napusgan a mangidaulo iti delegasion ti Filipinas iti 78th Session of the United Nations General Assembly (UNGA78) High-Level Week (HLW) manipud Septiembre 18 agingga 26.
Kinuna ni Manalo nga isunanto ti agsarita iti biang ti Presidente maipaan iti ilunglungalong ti Filipinas a panagturay ti linteg ken dagiti nasken nga aramiden tapno maep-ep ti epekto ti panagbaliw ti klima.
Kadua ni Manalo da Environment Secretary Maria Antonia Yulo-Loyzaga, Health Secretary Ted Herbosa, ken dadduma pay nga opisial ti Department of Finance (DOF) ken National Economic Development Authority (NEDA).
Mannurat ti Bannawag Clotilde C. Alzate, rinambakanna ti maika-100 a panagkasangayna
Innayon ni Manalo a pirmaanna ti baro a katulagan segun iti 1982 UN Convention on the Law of The Sea maipapan iti panangsalaknib ken naannad a pannakausar iti Biological diversity in areas Beyond National Jurisdiction (BBNJ) wenno "High Seas Treaty."
Iti umuna a tawenna kas Presidente, dimmar-ay ni Marcos iti asamblea ket inawisna idi dagiti 193 a kameng ti UN a marisut koma dagiti parikut babaen ti nainrasonan ken nainkalintegan a wagas. (Joseph Pedrajas/Manila Bulletin.)
