Indagdag ni Senador Grace Poe, daulo ti Senate Committee on Public Services, a pardasan koma ti gobierno nga iwaras ti National Identification Card (National ID) tapno manglapped iti panagraira dagiti manglimlimo a mangirehistro iti SIM (Subscriber Identity Modules) card.
Kinuna ni Poe nga umdas koman ti National ID para iti pannakairehistro ti SIM card, ngem idi masangsangal pay laeng ti SIM Registration Act, adu ti nagpakaasi a pagbalinen a nalaka ti panangirehistro iti SIM ta saan nga amin ket addaan iti opisial nga ID wenno balido a dokumento.
Ti pasaporte, National ID, Social Security System (SSS), Government Service Insurance System (GSIS) e-card, driver’s license, National Bureau of Investigation (NBI) clearance, police clearance, ken dadduma pay a dokumento kas iti firearm license dagiti opisial nga ID a maaramat iti panangirehistro iti SIM card.
Inanamongan ni Sen. Sherwin Gatchalian ti kapanunotan ni Sen. Poe, nga umdas koman nga usaren ti National ID iti pannakairehistro ti SIM ta narigat a kopiaen ti biometrics ti tao a nailanad iti National ID idinto ta saan amin nga ID ket naglaon iti kastoy nga impormasion.
Manipud Kadagiti Agdama a Kameng ti Bannawag: Dios ti Agngina!
Kinuna ni Gatchalian a gapu iti kinaadu dagiti ID a mabalin a mausar iti panangirehistro iti SIM, marigatanen dagiti telecommunication companies (telcos) a mangpatalged iti kinaasino ti agus-usar.
Innayon ni Gatchalian a nalaka laeng a mapeke dagiti agdama nga ID, ket saan daytoy a maberipikar dagiti telcos isu nga nakapagrehistro uray sunggo. (Hannah Torregoza/Manila Bulletin)
