Imbutaktak ni Commodore Jay Tarriela, pannakangiwat ti Philippine Coast Guard (PCG) iti West Philippine Sea (WPS) ita (Septiembre 18), a nakaron ti pannakadadael iti biag ti baybay iti Escoda (Sabina) Shoal, ta kasla "awanen ti biagna" daytoy gapu iti agtultuloy a panagraira dagiti barko ti Chinese maritime militia (CMM) iti WPS.
Kinompirmar ni Tarriela ti maysa a report nga impalgak ti Palawan-based Western Command (WesCom) ti Armed Forces of the Philippines (AFP) a mabalin a dagiti barko ti CMM ti makagapu iti dakkel a pannakadadael dagiti korales iti WPS.
Segun ken ni Tarriela, adda 33 a barko ti CMM a nasaripatpatan ti PCG iti Rozul Reef, idinto nga adda 15 a barko ti CMM iti Escoda Shoal manipud Agosto 9 agingga Septiembre 11.
Kinuna ni Tariella a ti agtultuloy a panagraira dagiti barko ti CMM nga agus-usar iti ilegal, awan pilpilienna, ken makadadael a wagas ti panagkalap iti Rozul Reef ken Escoda Shoal ket mabalin a nangdadael ti biag ti baybay iti WPS. (Martin Sadongdong/Manila Bulletin.)
