Nasken nga ilaylayon ti panagtrabaho dagiti kameng ti Kamara iti makalawas tapno saan a maitantan ti pannakaipaulog ti PhP5.768-trilion a General Appropriations Bill (GAB) wenno national budget para iti 2024, segun ken ni House Speaker Martin Romualdez itay Septiembre 17.
Marugian dagiti debate iti plenario inton Martes, Septiembre 19, ngem maaummongda iti plenario a sesion itoy a Lunes (Septiembre 18) kas kadawyan. Agsesion dagiti kameng ti Kamara manipud Lunes agingga Mierkules.
Kinuna ni Romualdez nga agtrabahoda iti bigat ken malem ken uray iti Huebes ken Biernes daytoy a bulan, no isu ti kasapulan, tapno maipasada ti GAB iti naikeddeng a tiempo, ta daytoy ti kapapatgan a gakat a nasken nga ipaulog ti Kamara a tinawen.
Tamingen ti Kamara ti badiet ti Department of Finance (DOF), Department of Tourism (DOT), ken National Economic and Development Authority (NEDA), agraman dagiti ahensia ken opisina nga adda iti babaen ti Office of the President (OP), inton Martes (Septiembre 19).
Manipud Kadagiti Agdama a Kameng ti Bannawag: Dios ti Agngina!
Matingiting ti badiet ti Office of the Ombudsman, Commission on Elections (COMELEC), Commission on Human Rights (CHR), Department of National Defense (DND), Department of Science and Technology (DOST), Department of Trade and Industry (DTI), ken dadduma pay a kameng ti OP, inton Mierkules (Septiembre 20).
Inton Huebes (Septiembre 21), ti badiet ti hudikatura, Department of Justice (DOJ), Department of Agrarian Reform (DAR), Presidential Communications Office (PCO), Department of Human Settlements and Urban Development (DHSD), ken state universities and colleges dagiti madakamat.
Badiet ti Kongreso, Department of Social Welfare and Development (DSWD), Department of Information and Communications Technology (DICT), Department of Migrant Workers (DMW), Department of Labor and Employment (DOLE), ken Department of the Interior and Local Government (DILG), agraman dagiti kamengda nga ahensia ken sumagmamano a korporasion ti gobierno ti sangalen ti Kamara inton Biernes (Septiembre 22).
Sumaruno ti badiet ti Civil Service Commission, Commission on Audit (CoA), Department of Energy (DoE), Department of Agriculture (DA), Department of Health (DOH), ken dadduma pay a kameng ti OP inton Septiembre 25.
Badiet ti OP, Office of the Vice President (OVP), Department of Education (DepEd), Metro Manila Development Authority (MMDA), Dangerous Drugs Board (DDB), dagiti natda a kameng ti OP, Department of Public Works and Highways (DPWH), ken Department of Environment and Natural Resources (DENR) ti risuten ti Kamara inton Septiembre 26, ket maudi a tingitingenda ti badiet ti Department of Foreign Affairs (DFA), Department of Transportation (DoTR), Department of Budget and Management (DBM), agraman ti lump-sum inton Septiembre 27.
Kalpasan ti manamnama a pannakaipaulog ti national budget, makabulan nga aginana ti Kongreso manipud Septiembre 30 agingga Nobiembre 5.(Ellson Quismorio/Manila Bulletin.)
