Iti maysa nga operasion a maibusor iti panangipuslit, natakuatan dagiti kameng ti Customs Intelligence and Investigation Service-Manila International Container Port (CIIS-MICP) ken ti Philippine Coast Guard (PCG) dagiti patienda a naipuslit a bagas nga aggatad iti PhP400-milion ken dadduma pay a naangkat a produkto iti tallo a bodega iti Tondo, Manila itay Septiembre 16.
Aggatad iti PHP310-milion dagiti nasamsamda a naangkat a produkto kas iti abalbalay, kosmetiko, alikamen iti kosina, videoke machine, sapatos, kawes, ag-agas ken dadduma pay a mabalin nga ilako. Malaksid kadagitoy, adda pay 36,083 a sako a bagas a naggapu iti Vietnam, Thailand, ken Myanmar nga agbalor iti PHP90.2-milion.
Kinuna ni Intelligence Group Deputy Commissioner Juvymax Uy nga iggemdan ti Letters of Authority (LOAs) sakbay a napanda iti tallo a bodega nga adda iti Antonio Rivera Street ken Dagupan Street iti Tondo.
Ti panangsarungkar ken panangsukisok ti Bureau of Customs (BOC) ket mayannatup iti Chapter 2, Section 224 ti Customs Modernization and Tariff Act (CMTA). (Aaron Recuenco/Manila Bulletin.)
