Pimmusay ni Amador Leaño Tolentino, Sr, retirado a Master Teacher 2 ti Pinili, Ilocos Norte itay napan a Lunes (Septiembre 18) iti pagtaenganna idiay Upon, Pinili, Ilocos Norte iti edad a 92.
Nangisuro ni Tolentino iti 28 a tawen iti Pugaoan-Bungro Elementary School iti met laeng Pinili sakbay a nagretiro idi 1990, maysa a tawen sakbay a nagretiro met ti kasimpungalanna a nakaklaseanna iti kolehio, ni dati a Serafina Blanco Zafaralla, asawana iti 63 a tawen.
Lima ti annakda: Jocelyn (+); Maria Victoria (+) [ken lakayna a ni Bruce Metcalf]; Eduardo [ken baketna a Grace], maysa nga inheniero a nakabase idiay Carcar City, Cebu; Amador Jr. [ken baketna a Beng Salomon, assistant vice president ti BPI Makati], abogado ken senior partner ti Tolentino Corvera Macasaet and Reig Law Firm iti Metro Manila; ken Leilani, presidente ti Amasera Holdings Inc.
Siam ti appo a naulila ni Tolentino Sr.
TURISMO: Intayon Idiay Ayuyang Garden iti Pila, Siudad ti Laoag!
Naipasngay ni Tolentino Sr. idiay Pallas, Vintar, Ilocos Norte, ken inleppasna ti elementary education degree iti Ilocos Norte Normal College (Mariano Marcos State University itan) iti Laoag a nagkaklaseanda ken Serafina (inkasarna idi kalgaw ti 1960 kalpasan ti panagraduarda).
Retirado met ni Serafina a kas Head Teacher III ken aktibo iti Senior Citizens Organization ti ilida bayat ti panangtartarawidwid ni Amador Sr. iti dagada idiay Upon. (Honor Blanco Cabie)
