Naidanon itay nabiit ti serbisio ti salun-at kadagiti agindeg iti Sitio Tagcar iti Barangay Mission, maysa a kadagiti kasulinekan a lugar ti Santa Teresita, Cagayan, babaen ti Sarungkar iti Barangay a programa ti Municipal Health Office (MHO).
Maysa kadagiti prioridad ti administrasion ni Mayor Rodrigo P. De Gracia ti panagtalinaed a nasalun-at, nasalukag ken naregta dagiti umili ket babaen ti regget dagiti health worker ti ili, maiwaywayat ti Sarungkar iti Barangay kadagiti nasulinek a lugar kas iti Sitio Tagcar a narigat a madanon ti lugan ti kabalbalayanna.
Inrusat ti MHO Team nga idauluan ni MHO Dr. Cynthia Lyn T. Melchor ken dagiti home-based personnel ti Human Resource for Health ti Department of Health a da Mycyla P. Guya ken Analyn Pichay.
Segun ken ni Ms. Guya, adda 28 a household iti Sitio Tagcar. Naikkan iti gundaway dagiti nataengan nga agpa-check-up. Naala ti presion ti darada. Naiwaras pay ti vitamin A supplements para met kadagiti 6-59 ti bulanna nga ubbing. Naited met dagiti pagpurga kadagiti agedad iti 12-59 a bulan nga ubbing.
Manipud Kadagiti Agdama a Kameng ti Bannawag: Dios ti Agngina!
Kalpasan ti check-up, naiwaras ti agas para iti gagangay a sakit kas iti sakit ti ulo, gurigor, panateng, uyek ken dadduma pay malaksid kadagiti natakuatan a sakit a masapul ti para maintenance nga agas kas iti high blood.
Saan pay a nadanon ti linia ti elektrisidad ti Sitio Tagcar ket agdepende dagiti agindeg iti solar power. Kadawyan a wagas ti transportasionda ti kulongkulong ken motorsiklo wenno pagpagnaenda lattan no mapanda agudong iti poblasion. (Laylany Toribio/Ladawan: Mycyla Guya)
