Manamnama nga agbalinen ti Filipinas a maysa kadagiti pagilian a mangbigbig ken mangraem iti panagdiborsio kalpasan nga aprobaran ti Senate Committee on Women, Children, Family Relations and Gender Equality ti Senate Bill (SB) No. 2443 wenno “Dissolution of Marriage Act."
Ti nagtitipon a bersion daytoy a naipaulog a kas Committee Report No. 124 ket sinurat da Senador Risa Hontiveros, Raffy Tulfo, Robin Padilla, Pia Cayetano, ken Imee Marcos ken pinirmaan da Senate President Pro Tempore Loren Legarda, Senate Minority Leader Aquilino “Koko” Pimentel III, Senador Grace Poe, ken Joseph Victor “JV” Ejercito ti SB 2443.
Segun iti SB 2443, mabalin a maysa kadagiti agassawa wenno isuda a dua ti agkiddaw iti korte a mawaswas ti kasarda maibasar kadagiti sumaganad:
1. Lima a tawendan a nagsina nga awan ti pangngeddeng ti korte, malaksid no impaulog ti korte a legal ti panagsinada maibatay iti Article 55 ti Family Code of the Philippines; no kastoy, nasken nga adda dua a tawenen manipud idi naipaulog ti deklarasion ti korte.
TURISMO: Intayon Idiay Ayuyang Garden iti Pila, Siudad ti Laoag!
2. Panangrames ti napetisionan (respondent) iti nagpetision (petitioner), sakbay wenno kalpasan ti panagkasarda.
3. Pisikal a kinaranggas wenno nakaro a panangabuso, a saan a kina-lesbian wenno homoseksualidad ti makaigapu, malaksid no maysa kadakuada wenno agpadada a nakikamalala.
4. Pinal a pannakaideklarar iti panagdiborsio manipud iti korte iti ruar ti Filipinas (foreign jurisdiction), asino man ti nakikasaranda.
5. Saanen a mapagkappia dagiti agassawa wenno saanen a maurnos ti pannakadadael ti linnangenda nupay inkagumaananda ti panagkappiada bayat ti “panagpalamiisda” iti las-ud ti 60 nga aldaw.
6. Pannakawaswas ti kasar a pinalubosan ti maysa a simbaan wenno sekta ti relihion, wenno pannakawaswas a palubosan ti sursuro ken kannawidan a bigbigen, awaten, ken ar-aramiden ti nakaibilanganda nga indigenous cultural community (ICC) wenno indigenous peoples (IP).
Maibatay iti SB 2443, no nagtulag ti agassawa nga agsinnubliananda iti ania man a kanito, mayaplikar ti proseso a sagudayen ti Article 64, 65 ken 66 ti Family Code of the Philippines.
Iti biang ti Kamara, naaprobaranen ti bersion daytoy sumagmamanon a tawen ti napalabas. (Hannah Torregoza/Manila Bulletin.)
