Saan nga isuko ni Presidente Ferdinand Marcos Jr. ti inkarina a pannakaipababa ti presio ti bagas iti PhP20 tunggal kilo ta segun kenkuana, adda latta tiansa para iti pannakatungpal daytoy.
Iti panangiterbiu ti media iti presidente idiay Zamboanga City itay nabiit, kinunana a posible a matungpal ti PhP20-kilo a bagas apaman a sumayaat ti lokal a produksion.
"Basta la ketdi mapasayaattayo ti produksiontayo, no saantayo unayen a mabagyo ken mausar dagiti mannalon ti tulong a maipapaay kadakuada," inlawlawag ni Marcos.
Kinunana nga adda dagiti makaigapu a bambanag a mapaspasamak iti ruar ti Filipinas a direkta a makaapektar kadagiti presio dagiti kangrunaan a masapsapul iti pagilian, isu a masapul nga ag-adjust ti gobierno ken ti merkado.
BROADCAST MEDIA: Asino ni Shalimar?
Innayon ti presidente a no agbalinen a normal ti situasion, dakkel ti namnama a maipababa ti presio ti bagas.
Itay nabiit, nangituding ni Marcos iti price ceiling a PhP41 tunggal kilo ti regular milled a bagas idinto PhP45 ti tunggal kilo ti well-milled a bagas.
Idi Septiembre 18, nangituding met ti National Food Authority (NFA) Council iti baro a presio para iti panaggatang iti irik.
Manipud iti dati a PhP19, PhP23 itan ti paggatang ti NFA iti tunggal kilo ti nabilag nga irik, PhP19 met ti tunggal kilo ti wet palay (kaap-apit) manipud iti dati a PhP16. (BETHEENA UNITE/Manila Bulletin)
