Indatag ni Senator Risa Hontiveros iti Senado ti Senate Resolution 797 a mangkidkiddaw iti pannakaimbestigar ti kaso dagiti ubbing a pagarupenna a seksual a naabuso ken pinilit a makikallaysa ti maysa a kulto iti Socorro, Surigao del Norte.
Kinuna ni Hontiveros a ti "Socorro Bayanihan Services Inc." (SBSI) nga idauluan ni Jey Rence Quilario a nabirngasan ti “Senior Agila” ket nangrugi kas maysa a civic organization nga addaan iti 3,650 a kameng ket 1,587 ditoy ti menor de edad.
Patien dagiti kameng ti SBSI a ni Quilario ti sumaruno a Mesias ken baro a Jesus, ket bigbigenda nga isu ti reinkarnasion ni Senior Santo Niño.
Imbatad ni Sen. Hontiveros nga adda walo nga ubbing ti nakalapsut iti kulto ket dimmawatda ti tulong iti munisipio idi Hulio. Binukel ni Socorro Mayor Riza Timcang iti task force a mangtaming iti ar-aramiden ti kulto ngem awan naaramidan dagitoy ta nagipila iti habeas corpus writ dagiti nagannak dagiti ubbing, idinto a maysa kadagitoy ti naisublin iti kulto.
TURISMO: Intayon Idiay Ayuyang Garden iti Pila, Siudad ti Laoag!
Segun ken ni Sen. Ronald “Bato” Dela Rosa a chairman ti Senate Committee on Public Order and Dangerous Drugs, mapilit a maikallaysa dagiti kameng ti SBSI nga agtawen iti 12 iti supreme leader-da (Quilario), ngem agpili pay ni Quilario iti ubing a babai a kaiddaenna iti maysa a rabii sakbay nga ikasarna.
Innayonna a maiparit kadagiti ubbing ti rummuar iti inaladan agingga saanda a maikallaysa.
Malaksid daytoy, inkapilitan nga alaen ti SBSI ti 50% ti matgedan dagiti allawagi ken mason a kamengda; 50% ti makalapan dagiti mangngalap; 30% a bingay ti naglakuan ti daga ti kamengda; idinto a 50% ti gatad a maaw-awat dagiti 4P's ken senior citizen.
Kinuna pay ni Dela Rosa a nasken a maimbestigaran dagiti kulto a mangbiang iti pagbiagan ti inosente a komunidad, agraman ti kaadda ti personal nga armada ken laboratorio ti shabu ta pangta dagitoy iti natalinaay a komunidad. (Hannah Torregoza/Manila Bulletin.)
