Pimmusay ni Corazon Atencio Maen, retirado a mannursuro iti Plebeian Academy iti Moncada, Tarlac, iti Kaiser Vallejo Hospital idiay California, Estados Unidos idi Setiembre 20 (21 ditoy Filipinas) iti edad a 79.
Isu ti inaunaan kadagiti uppat nga annak a babbai da Feliciano M. Atencio, nagpaay a mayor ti ili ti Moncada iti dandani 16 a tawen, ken ni dati a Zenaida Alegre ti Paoay, Ilocos Norte.
Inulila ni Corazon ti asawana a ni Isidro, kameng ti US Navy ken beterano ti gubat idiay Vietnam ken Middle East; dagiti annakda a ni Orville, squad leader ti US Marine Corps ken beterano met ti gubat idiay Middle East, ken ni Michael; dua nga appoko a lallaki ken maysa nga apoko a babai,
Mairaman kadagiti inulilana dagiti kakabsatna: Carmen, nga agnanaed idiay California (balo ni US Air Force Major Ernest Jay Maske); Maria Rosa, bise presidente ti GUMIL Metro Manila ken agindeg ditoy Filipinas (kaungot ni Honor Blanco Cabie, Opinion Editor ti Manila Standard); ken Gertrudes, agyan met idiay California.
TURISMO: Intayon Idiay Ayuyang Garden iti Pila, Siudad ti Laoag!
Nangisuro ni Corazon iti Plebeian Academy kalpasan ti panangileppasna iti elementary education ken education a kurso iti Nicanor Reyes College idiay Paniqui, Tarlac, sakbay a napan iti America a yan ni Isidro (tubo met laeng ti Paniqui, Tarlac).
Nagtrabaho pay ni Corazon iti Silverado Resorts idiay Napa Valley, California kas superbisor sakbay a nagretiro.
Kuna dagiti kakabagian ken gagayyemna a natadem ti dilana ngem nalaing nga agpakatawa, malaksid ti kinapasnekna no adda iti kosina a paglutlutuanna iti pinakbet, adobo ken buro.
“In more ways than one, she has stood as a pillar of strength and a beacon of hope for all of us who have entered the doors of the home that she has built with her husband. Their home has always been a place of family reunions and gatherings, always a place of welcome, and a place of happy memories,” kinuna ti maysa a nasinged a gayyemna.
Pagsasaritaan pay laeng ti pamiliana no kaano ti pumponna. (Honor Blanco Cabie)
