Tinignay ni House Speaker Martin Romualdez dagiti kameng ti Bureau of Customs (BOC) nga ipiladan ti darum maibusor kadagiti agipuspuslit iti bagas, pakairamananen dagiti adda iti likudan ti ilegal a pannakaiserrek ti bagas iti sangladan ti Mindanao.
Imbalakad ni Romualdez iti BOC a saan laeng koma a ti pannakakompiskar dagiti naipuslit a produkto ti aramiden ti ahensia no di ket idarumda koma a dagus dagiti ismagler ta no saan a maibalud wenno madusa dagiti naglabsing, agaramiddanto latta iti ilegal uray pay makompiskar dagiti produktoda.
Imbaga ni Romualdez daytoy iti laksid a sinuportaranna ti desision ni Presidente Marcos a mangiwaras kadagiti nakompiskar a naipuslit a bagas kadagiti benepisiario ti 4Ps (Pantawid Pamilyang Pilipino Program) iti Zamboanga City itay Septiembre 19. (Ellson Quismoro, Manila Bulletin/Lito P. Hilidon, Bannawag.)
