Impaulog ti Malakanyang itay Septiembre 21 ti Memorandum Circular (MC) 32 a mangipakpakaammo iti pannakasuspende ti trabaho kadagiti opisina ti Ehekutibo inton Lunes, Septiembre 25, a mangrugi iti alas-3:00 iti malem.
Iti sirkular a pinirmaan ni Executive Secretary Lucas Bersamin, masuspende ti trabaho dagiti empleado ti gobierno tapno maikkanda iti gundaway a mangilatang iti oras para iti pamiliada, kas panangrambak iti 31st Family Week, kas sagudayen ti Proclamation No. 60 (s. 1992).
Ngem mailaksid iti sirkular dagiti kameng ti ahensia a mangipapaay iti kangrunaan a serbisio iti salun-at, panagsagana wenno panagresponde iti didigra ken kalamidad, ken dadduma pay a nasken a serbisio, ta agtultuloy latta ti operasion dagitoy.
Inallukoy ti sirkular dagiti dadduma pay a sanga ti gobierno agraman ti pribado a sektor nga ipaayda ti gundaway kadagiti empleadoda a mangrambak iti Family Week. (Argyll Cyrus Geducos, Manila Bulletin/ Lito P. Hilidon, Bannawag)
