Indeklarar ni Presidente Ferdinand "Bongbong" Marcos Jr. a kas "urgent" ti Senate Bill (SB) No. 2432 a mangikeddeng no ania ti krimen a maibilang nga "agricultural economic sabotage," dagiti dusa a maipataw kadagiti aglabsing, ken pannakabukel ti maysa nga anti-agricultural economic sabotage council.
Iti suratna ken ni Senate President Juan Miguel Zubiri itay Septiembre 20, kiniddaw ni PBBM a maipaulog koma a dagus ti SB 2432 tapno masalakniban dagiti mannalon ken mangngalap manipud kadagiti mananggundaway a negosiante ken agang-angkat iti baet ti ngumatngato a presio ken panagkurkurang dagiti agrikultural a produkto gapu iti panagipuslit, panagilemmeng, nalabes a panagganansia, ken kartel.
Dagiti empleado wenno opisial ti gobierno a mapaneknekan a kakomplot dagiti naglabsing ket tungpal-biag a madiskualipikar iti panagakem iti aniaman a posision iti gobierno, panagbotos, pannakipaset iti ania man nga eleksion, agraman pannakawaswas dagiti amin a benepisioda.
Nakapila daytoy a gakat iti Senado idinto nga iringringpas ti Technical Working Group ti pinal a bersion daytoy iti Kamara. (Argyll Cyrus Geducos, Manila Bulletin/ Lito P. Hilidon, Bannawag.)
