SIUDAD TI BATAC. Adu dagiti dimmar-ay iti pannakalukat ti maika-6 nga MMSU-PhilRice Rice Paddy Art a naipasdek iti Mariano Marcos State University (MMSU) itoy a siudad itay Septiembre 11, 2023. Kangrunaan a ladawan a naipinta iti daytoy a tawen ket ti presidente ti pagilian agraman ti Bagong Pilipinas a kangrunaan nga itantandudona. Naaramat ti dua a barayti ti pagay, IR 1552 wenno purple variety ken NSIC Rc 222, tapno makita ti muestra ti ladawan. Iti ladawan, kinagrupo ni Presidente Ferdinand “Bongbong” Marcos dagiti estudiante ti College of Agriculture, Food and Sustainable Development (CAFSD) a mangal-ala iti kurso nga agrikultura ken nagraep idi Agosto 14-15 tapno “maipinta” ti ladawan ni PBBM iti talon. Nairaman pay iti ladawan ni First Lady Atty. Marie Louise Araneta-Marcos ken dadduma pay a kameng ti Pamilia Marcos; City Mayor Albert Chua ti Siudad ti Batac; Gob. Matthew Marcos Manotoc ti Ilocos Norte; Dr. John C. De Leon, Executive Director ti PhilRice; Dr. Shirley C. Agrupis, Presidente ti MMSU; Bise Gobernador Cecilia Araneta Marcos ti Ilocos Norte; Rep. Ferdinand Alexander A. Marcos (District 1); ken Rep. Angelo M. Barba (District 2). (Teksto: Mercy R. Gaño/ Ladawan: Pammadayaw iti Office of the Strategic Communication-Documentation Services)
Naipablaak iti Oktubre 16-31, 2023 a bilang ti Bannawag.
