Dagiti piloto ti eroplano ken dagiti kakaduada a propesional dagiti kangangatuan ti sueldona iti Filipinas, segun iti 2022 Occupational Wages Survey ti Philippine Statistics Authority (PSA).

Iti nasao a surbey, immuna iti puesto dagiti piloto ken kakaduada babaen ti average a binulan a matgedanda nga aganay a ₱135,363.

Simmaruno dagiti software developer nga agob-obra kadagiti pagtrabahuan iti information service, nga agsusueldo iti ₱70,595 iti binulan.

Dagiti tallo a sumaruno a kangatuan ti maganarda a propesional, pakairamanan dagiti mathematician ken actuaries nga agsusueldo iti ₱69,654; dagiti production managers ken general foremen nga agsusueldo iti ₱63,017; ken dagiti applications programmers a masusuelduan iti ₱58,643.

Dagiti dadduma pay nga adda iti sangapulo a kangangatuan: specialist medical practitioners, ₱57,476; statisticians, ₱51,607; medical doctors wenno generalist medical practitioners, ₱51,251; geologists, ₱49,059; ken accountants, ₱48,982.

Segun pay iti PSA, iti met laeng 2022, aganay a ₱18,423 ti kadagupan nga average a binulan a sueldo dagiti full-time a time-rated a trabahador iti nasurbey a 193 a panggedan iti 72 a napili nga industria.

Iti pay 2022, ngimmato met iti ₱14,588 tunggal bulan ti median basic pay dagiti full-time a time-rated a trabahador iti amin nga industria. (Xander Dave Ceballor, MANILA BULLETIN/Roy V. Aragon, BANNAWAG)