Binilin ni President Ferdinand "Bongbong" Marcos Jr. ti Department of Social Welfare and Development (DSWD) itay Septiembre 24 nga ikkanda ti ayuda dagiti babassit a tianggi (sari-sari store) a naapektaran ti naipaulog nga Executive Order (EO) 39.
Kinuna ni DSWD Secretary Rex Gatchalian a maikkan iti PhP15,000 a tulong a kuarta dagiti naapektaran nga agtagikua iti tianggi ket maiwaras daytoy manipud Septiembre 25 agingga 29.
Tumulong ti Department of Trade and Industry (DTI) iti pannakaitudo dagiti mabalin a benepisiario.
Inaprobaran ni PBBM ti presio a PhP41 tunggal kilo ti regular milled a bagas ken PhP45 tunggal kilo ti well-milled a bagas babaen ti EO 39.
Manipud Kadagiti Agdama a Kameng ti Bannawag: Dios ti Agngina!
Segun iti DSWD, mapanen a PhP92.415-milion ti nairuar a tulong a kuarta, ket 6,161 pay laeng ti naikkan idinto a 8,390 a babassit a negosiante ti namnamaenda a naapektaran iti pannakaipatungpal iti EO 39. (Betheena Unite/Manila Bulletin/Lito P. Hilidon/Bannawag)
