Indirekta a maapektaran ti sektor ti agrikultura iti pagilian no saan a maisubli ti nakissay a PhP6.2-bilion a badiet ti 30 nga state universities and colleges (SUCs) iti babaen ti PhP5.768-trilion a General Appropriations Bill para iti 2024.
Imbatad daytoy ni Cagayan de Oro City 2nd District Rep. Rufus Rodriguez kas panangsuportarna iti petision dagiti SUCs a maisubli koma dagiti pondoda.
"Suportarantayo dagiti estudiantetayo kadagitoy nga SUCs babaen ti panangilatang iti umdas a pondo para kadagiti eskuelada," kinuna ni Rodriguez. "Ipangrunatayo ti edukasion dagiti agtutubo, isublitayo ti PhP6.2-bilion a naipaidam kadakuada," innayonna.
Segun ken ni Rodriguez, nairaman kadagiti 30 a publiko nga unibersidad ken kolehio ti sumagmamano nga eskuela ti agrikultura kadagiti probinsia. Kinunana a no makissayan ti pondo dagitoy nga eskuela, maapektaran la ketdi ti agrikultural a produksion ken kinaumdas ti taraon iti pagilian.
Manipud Kadagiti Agdama a Kameng ti Bannawag: Dios ti Agngina!
Inlawlawagna a mabalin a maisubli ti PhP6.2-bilion kadagiti 30 nga SUCs babaen ti panangala iti isu met la a gatad manipud kadagiti sabali nga ahensia wenno dadduma pay a nakailatangan ti nailian a badiet.
"Mabalintayo nga ikabassit ti pannakapondo dagiti saan unay nga importante a paggastuan kas iti panag-travel, representation ken entertainment, panaggatang iti luglugan, renovation ti opisina, ken uray dagiti babayadan iti danum, koriente ken telepono tapno makapataud iti forced savings a pabor kadagiti estudiantetayo," kinunana.
Kinunana pay a mailatangan koma dagiti 30 nga SUCs iti isu met la a gatad ti badietda iti daytoy a tawen (2023). (Ellson Quismorio, MANILA BULLETIN/Roy V. Aragon, BANNAWAG)
