Inanamongan dagiti 278 a diputado ti House Bill (HB) No. 9021 wenno ti "Refund for Internet and Telecommunications Services Outages and Disruptions Act," maysa a gakat a mangpaisubli iti bayad dagiti agus-usar iti internet no agawan wenno agpukawpukaw ti serbisioda.
Mandaran ti HB 9021 dagiti public telecommunications entities (PTEs), agraman dagiti internet service providers (ISPs) a maisubli wenno maipababa ti baybayadan ti kustomer a naapektaran iti panagawan wenno panagpukawpukaw ti serbisio ti internet iti las-ud ti 24 oras wenno nasursurok pay, iti las-ud ti makabulan.
Kinuna ni House Speaker Martin Romualdez Jr. a ti natalged nga internet ket katukadna itan ti kangrunaan a kalintegan ti tao ta adu ti pakausaran daytoy a mangpanam-ay iti biag, ket gapu ta baybayadan daytoy a serbisio, rumbeng laeng a maisubli ti bayad no saan a maipaay ti serbisio.
Inlanad pay ti HB 9021 no ania dagiti sirkumstansia a saan a nasken a maisubli wenno maipababa ti baybayadan a serbisio ti internet, kas iti naikeddeng a pannakamantener, di napakpakadaan wenno di naiparna a pasamak, ken aramid ti kustomer wenno sabali a tao.
TURISMO: Intayon Idiay Ayuyang Garden iti Pila, Siudad ti Laoag!
Agmulta ti di nababbaba ngem PhP50,000 ngem saan a nasursurok ngem PhP200,000 iti tunggal panaglabsing. Mabalin pay a marebokar ti lisensia , rehistro, weno prangkisa dagiti PTE wenno ISP a maulit-ulit ti panaglabsingna.
Ti National Telecommunications Commission (NTC) ti napusgan a makibinnadang iti Department of Information and Communications Technology (DICT) ken amin nga ahensia a maseknan iti pannakasangal dagiti paglintegan ken regulasion para iti naannayas a pannakaipatungpal daytoy a gakat. (Ellson Quismorio/Manila Bulletin//Lito P. Hilidon/Bannawag)
