Saan nga immanamong ni Presidente Ferdinand "Bongbong" Marcos Jr. a maipababa ti taripa ti bagas tapno maipalaka ti presio ti bagas iti merkado.
Segun iti Presidential Communications Office (PCO), daytoy ti pangngeddeng ni PBBM kalpasan ti pannakiumanna iti National Economic and Development Authority (NEDA), Department of Finance (DOF), Department of Trade and Industry (DTI), ken ti Department of Budget and Management (DBM).
Kinuna ti PCO nga immanamong ni NEDA Secretary Arsenio Balisacan, ken da Department of Agriculture (DA) Undersecretary Leocadio Sebastian ken Mercedita Sombilla iti pangngeddeng ni PBBM a saan pay a panawen nga ipababa ti taripa idinto a mapattapatta a bumaba ti sangalubongan a presio ti bagas.
Itay Septiembre 26, nag-rally dagiti gunglo dagiti mannalon ken ti kabsat ni PBBM a ni Senador Imee Marcos ket sinupiatda ti pannakaipababa ti taripa ti bagas ta kinunada a dagiti agang-angkat laeng ti agnumar ditoy ken nakarkaro a mangpababa iti presio ti irik.
TURISMO: Intayon Idiay Ayuyang Garden iti Pila, Siudad ti Laoag!
Kiniddawda pay ti panaglusulos da Balisacan ken Finance Secretary Benjamin Diokno a nangisingasing a maipababa ti taripa tapno mawaswas ti Executive Order (EO) No. 39 a mangtengtengngel iti presio ti bagas a naipaulog idi Septiembre 5.
Kinuna ni PBBM nga awan ti gandatna a waswasen ti EO 39, ngem tapno maep-ep ti epekto ti naituding a presio ti bagas, minandaranna ti Department of Social Welfare and Development (DSWD) a mangted iti PhP15,000 nga ayuda kadagiti maseknan.
Malaksid ditoy, nagibunong pay ni PBBM iti sinako a bagas kadagiti benepisiario ti Pantawid Pamilyang Pilipino Program (4Ps). (Raymund Antonio/Manila Bulletin//Lito P. Hilidon/Bannawag.)
