Mapan a USD300,000 (wenno agarup PhP17 a milion) ti dawdawaten ti Medusa Ransomware Group iti gobierno ti Filipinas, ket nagpangta dagitoy nga iwarasda ti datos ti Philippine Health Insurance Corporation (PhilHealth) no agkedkedda.
Ngem kinuna ti Department of Information and Communications Technology (DICT) a saan nga agbayad ti gobierno iti ania man a ransom gapu iti pannaka-hack ti PhilHealth.
Kinuna ni DICT Undersecretary Jeffrey Dy iti maysa nga interbiu iti CNN itay Septiembre 26 a saan a bayadan ti gobierno ti ania man a ransom para iti ania man a kita ti krimen, agraman cyber-attack.
Kinompirmar ni Dy a ti nakompromiso a datos ti PhilHealth ket addan iti makunkuna a dark web -- ti paset ti world wide web a maakses laeng babaen ti panagusar iti sabali a kita ti software. Ket pinaneknekan daytoy dagiti hacker ta nagipaskilda ti dadduma a datos ti PhilHealth.
TURISMO: Intayon Idiay Ayuyang Garden iti Pila, Siudad ti Laoag!
Impaganetget ni Dy nga ibilang ti ahensia daytoy a pasamak a serioso unay, ta saan laeng a dagiti dokumento ti naala dagiti hacker, no di dagiti pay impormasion dagiti empleado ti PhilHealth, agraman dagiti kompidensial a memorandum.
Kinuna ni Dy a dida ammo ti APT (Advanced Persistent Threat), ken ti modus operandi dagiti hacker.
Innayon ni Dy nga uray makakalap ti gobierno iti ebidensia babaen ti nasientipikuan nga imbestigasion ken babaen ti tulong ti Cybercrime Investigation Coordination Center, saan latta a maidarum dagiti hacker ta agtalinaed a di maiganan ti kinaasino dagitoy. (Sonny Daanoy, Manila Bulletin/ Lito P. Hilidon, Bannawag.)
