Mairaman ti nagtipon a PhP650-milion a confidential fund ti Office of the Vice President (OVP) ken Department of Education (DepEd) nga idauluan ni Vice President Sara Duterte kadagiti pondo a mayakar iti ahensia a mangtaming iti kumarkaro a pangta iti West Philippine Sea (WPS).
Daytoy ti imbatad ni Ako Bicol Party-list Rep. Zaldy Co itay Septiembre 27.
Maibatay iti naipaulog a PhP5.768-trilion a General Appropriations Bill (GAB) wenno gakat a National Budget para iti 2024, mapan a PhP500-milion ti nailatang a confidential fund ti OVP idinto a PhP150-milion iti DepEd.
Itay Mierkoles (Septiembre 27), impalgak dagiti diputado a daulo ti nadumaduma a partido politikal iti Kamara a yallatiwda dagiti confidential and intelligence fund (CIF) a nailatang iti ahensia nga awan pakainaiganna iti panangsalaknib iti kinatalna ken kinatalged ti pagilian.
Manipud Kadagiti Agdama a Kameng ti Bannawag: Dios ti Agngina!
Mailatang ketdi dagitoy iti ahensia kas iti National Intelligence Coordinating Agency (NICA), National Security Council (NSC), Philippine Coast Guard (PCG), ken ti Bureau of Fisheries and Aquatic Resources (BFAR).
Nabukel daytoy a pangngeddeng kalpasan a nangikabil ti Chinese Coast Guard (CCG) iti bangen iti Bajo de Masinloc wenno Scarborough shoal iti Zambales a manglapped kadagiti Filipino nga agkalap sadiay. (Ellson Quismorio/Manila Bulletin//Lito Hilidon/Bannawag.)
