Daniw ni JUAN G. AQUINO
Nairtengka a kas tali ti silo a naltat
Nairutka a mangbekkel anges nga agtunglab,
Natademka a kas kuko a kumutukot
Mangderder tulang, kudil ken kulapot.
Napanaaska kas 'ti sugat no sumagepsep
Tedtedka ti suka wenno tutot ti kuribetbet,
Naut-otka kas 'ti binukbok a ngipen
A makasusop iti nasam-it wenno naalsem.
Sika ti natektekan nga abaga ti mangngalap
A mangibaklay iti tabukol a maisaruag,
Sika ti mautoyan a takiag a mangitag-ay
Iti nadagsen a martilio a pagpanday.
Sika ti maktangan a teltel ti agdadait
Agdumog manipud bigat ingganat' lumnek init,
Sika ti simmikkil a bukot ti agtaltalon
Agrukob agmalmalem tapno mairaep bunubon.
5 a Daniw
Sika ti agtigtigerger nga imat' agpalpalama
Nakaunnat a dumawat mailimos kenkuana,
Sika ti nalatlatan a sibet a mangub-ubba
'Ti maladaga nga anak tapno maiyayyaya.
Sika ti puris a kimpet iti kalantayan
Wenno salugsog iti kawayan a pagkaptan,
Ngem sika met ti imat' natalged a bayabay
Agitulod iti im-impen iti bangir ti rangtay.
Sikat' timek ti Linteg a mangyetnag
Nabuksilan a pagannurotan panagbiag;
Masapul ti bassit a panagbannog
No teggedem gunggona sakbay a magun-od.
