Uppat nga aldaw laengen sa madanon ti deadline nga intuding ti grupo dagiti hacker a maawagan iti Medusa iti Philippine Health Insurance Corporation (PhilHealth) tapno tungpalen daytoy ti dawat ti Medusa a panangbayad ti nasao nga ahensia iti USD300,000 tapno isublida dagiti tinakawda a datos, idinto nga agkedked met ti gobierno a mangted iti aniaman a gatad kas panangsurot iti "no ransom policy" ti gobierno.
Ipaspasakbay dagiti eksperto iti cybersecurity a pakaruen pay ti Medusa ti pangta nga iruarda dagiti sensitibo ken Personally Identifiable Information (PII) a mangkarit iti imbatad ti PhilHealth nga awan ti nakompromiso a PII.
Rinibu a PII ti PhilHealth ti naipadamag nga addan a 'mailaklako' iti makunkuna a dark web (maysa a nalimed a virtual a disso wenno paset ti internet a kaaduanna a paguummongan dagiti hacker kdp. a cybercriminal), segun iti panagsukisok ni John Patrick Lita, CEO ken Founder ti SOROS Securities, Inc., maysa a kompania ti cybersecurity.
Kinuna ni Renzon Cruz, Principal DFIR Consultant (maysa a cybersecurity expert), a mabalin a mangiruar ti Medusa iti video nga agpaut iti 30 agingga 50 a minuto no saan nga agtungpal ti PhilHealth iti ransom, ket iwaragawag dagitoy dagiti PII data ken ID iti amin a social media platform kas iti X (dati a Twitter), Telegram, ken Facebook.
TURISMO: Intayon Idiay Ayuyang Garden iti Pila, Siudad ti Laoag!
Metikuloso ti panaggaraw ti Medusa group ta addaanda pay iti media group nga agparnuay ken mangiwaras iti PR documents, video, ken paskil iti social media. Nalatak ti grupo a Medusa nga agipabpablaak kadagiti tinakawda a datos iti amin a wagas ken agus-usarda iti nadumaduma a kinatao iti internet.
Umad-adu dagiti maseknan iti pangta ti Medusa nga iruarda dagiti files ti PhilHealth, idinto a palpaliiwen dagiti eksperto ken ti publiko dagiti mapaspasamak ken agsagsaganada iti mabalin nga epekto ti sumaruno nga aramiden ti grupo a Medusa. (Art Samaniego, Manila Bulletin/Lito Hilidon, Bannawag.)
