Tapno mapasayaat pay ti konserbasion ken pannakasalaknib ti ludong, ti mabigbig a kanginaan a lames iti pagilian, inyetnag ti Bureau of Fisheries and Aquatic Resources (BFAR) ti Cagayan Valley ti naing-inget a pannakaipakat ti panawen ti pannakaisardeng ti panagkalap (closed season) iti nasao a lames.
Mangrugi ti pannakaisardeng ti panagkalap iti ludong iti Cagayan River iti Oktubre 1 agingga iti Nobiembre 15 ta iti daytoy a panawen ti panagitlog wenno panagbugi ti ludong iti nasao a karayan.
Kinuna ni Arsenio Bañares, hepe ti Fisheries Management, Regulatory and Enforcement Division ti BFAR, a kabayatan ti pannakaisardeng ti panagkalap, nainget ti pannakaiparit ti panagtiliw, panaggatang, panaglako, panagluto/panagidasar iti ludong.
Segun ken ni Bañares, nainget a bambantayan dagiti river warden dagiti lugar a maibilang a "hotspot" ti ludong kas iti Aparri, Lal-lo, Amulung, ken Tuguegarao City iti Cagayan ken Tumauini iti Isabela.
TURISMO: Intayon Idiay Ayuyang Garden iti Pila, Siudad ti Laoag!
Naipangato met ti dusa ti agkalap iti agbugbugi a ludong kabayatan ti pannakaisardeng ti panagkalap iti PhP80,000 a multa ken/wenno pannakaibalud iti 8 a tawen, manipud iti dati a PhP200 a multa ken/wenno pannakaibalud agingga iti 6 a bulan.
Am-ammo ti "ludong" a kas "lames ti Presidente" ta mapapati a paborito idi ni Presidente Ferdinand E. Marcos Sr. daytoy. Gapu iti napardas a pannakaibus daytoy a lames ken iti naiduma a kinaimasna no mailuto, umabot ti presiona iti PhP6,000 wenno nasursurok pay tunggal kilo.
Maawagan pay ti ludong a kas "banak," lobed river mullet, Pacific salmon, ken addaan scientific name a Cestraeus plicatilis.
Segun iti BFAR, malaksid iti Cagayan River, masarakan met ti ludong iti Santa-Abra River System iti nagbedngan dagiti probinsia ti Ilocos Sur ken Abra. (Villamor Visaya Jr., Philippine News Agency)
