Nagsaon ni Presidente Ferdinand "Bongbong" Marcos Jr. maipapan iti isyu ti Scarborough Shoal. Kinunana a likliklikan ti gobierno ti Filipinas ti ania man a riri wenno pannakisinnungbat iti China ngem agtultuloy latta ti gobierno a mangsalaknib iti teritorio ti Filipinas.
Iti maysa nga interbiu iti Siargao Island iti Surigao del Norte, kinuna ni PBBM a saan nga agbirbirok iti riri ti gobierno, ngem agtultuloy latta ti pannakasalaknib ti pagilian, iti masakupanna a taaw, ken ti kalintegan dagiti mangngalap iti lugar a nabayagen a pagkalkalapanda.
Dinillaw ni PBBM ti panangbangen ti China Coast Guard iti Bajo de Masinloc, ket impaganetgetna a rumbeng laeng a maikkat ti inkabil ti China a bangen ta masakupan ti Filipinas daytoy. (Betheena Unite/Manila Bulletin//Lito Hilidon/Bannawag)
