Segun iti Department of Health Center for Health Development ti Ilocos Region (DOH-CHD-1), agdagup iti 21 a kaso ti rabies ti nailista iti Ilocos Region manipud Enero 1 agingga iti Septiembre 6.
Nangatngato daytoy iti 110% ngem iti 10 a kaso a nailista iti agpada a bulan idi napalabas a tawen.
Kinuna ni DOH-CHD-1 medical officer Rheuel Bobis nga iti bilang dagiti kaso, 10 ti nailista iti Ilocos Norte, 2 iti Ilocos Sur, 3 iti La Union, ken 6 iti Pangasinan. Nagbanag amin dagitoy iti ipapatay.
Kinuna pay ni Bobis a karbengan dagiti agtartaraken a tinawen a pabakunaan dagiti tarakenda kontra iti rabies agraman booster shots tapno agtalinaed ti salun-at ken mayadayo iti virus dagiti tarakenda.
Manipud Kadagiti Agdama a Kameng ti Bannawag: Dios ti Agngina!
Makapapatay ti rabies, idinto ta adda 99% a case fatality rate daytoy no makagat iti kritikal a paset ti bagi kas iti rupa, takiag, wenno luppo. Ngem maliklikan daytoy no masigud ken umisu ti maipaay a panangagas, ken mabakunaan iti kontra rabies. (Hilda Austria/pna.gov.ph//Lito Hilidon/Bannawag.)
