Maysa a maritime domain awareness (MDA) flight ti inwayat ti Philippine Coast Guard (PCG) ken ti Bureau of Fisheries and Aquatic Resources (BFAR) iti Bajo de Masinloc (Scarborough wenno Panatag Shoal) itay Septiembre 28, sumagmamano nga aldaw kalpasan ti pannakaputed ti agtaptapaw a bangen a nangpawil kadagiti mangngalap a Filipino a makastrek iti napnuan-gameng a baknad.
Daytoy ti impalgak ni Commodore Jay Tarriela, a pannakangiwat ti PCG iti West Philippine Sea (WPS) itay Septiembre 28.
Babaen ti MDA flight, napennek ti PCG a naikkaten ti agtaptapaw a bangen nga inkabil dagiti barko ti China Coast Guard (CCG) ken Chinese maritime militia (CMM) iti abagatan a daya ti Bajo de Masinloc, ta inikkaten ti CCG daytoy.
Inlawlawag ni Tarriela a saan a ti PCG ti nangikkat iti agtaptapaw a bangen, no di dagiti met laeng CCG idi naammuan dagitoy a pinuted ti PCG ti angkla.
TURISMO: Intayon Idiay Ayuyang Garden iti Pila, Siudad ti Laoag!
Idi maputed ti angkla, kinuna ni Tarriela a 54 a mangngalap a Filipino ti nagkalap iti asideg ti Bajo de Masinloc ket nakakalapda iti agdagup 168 a tonelada ti ikan.
Innayon pay ni Tarriela a marigatan latta nga agkalap dagiti Filipino iti luek ti Bajo de Masinloc ta umas-asibay latta dagiti CCG.
Kinuna ni Tarriela nga 3 a barko ti CCG ken maysa a barko ti CMM ti nasaripatpatanda bayat ti MDA flight, idinto nga adda 2 a barko ti Filipino nga agkalkalap iti Bajo de Masinloc. (Martin Sadongdong/Manila Bulletin//Lito Hilidon/Bannawag)
