Pinaneknekan ni Ernest John (EJ) Obiena nga isu ti ari ti pole vault iti Asia iti 19th Asian Games iti Hangzhou, China itay Septiembre 30.
Iti sango dagiti rinibu nga agbuybuya iti Hangzhou Olympic Stadium kasla timmayok nga agila ni Obiena ket nalagtona ti kangato a 5.90 a metro iti damo pay laeng a panangpadasna, tapno yalatna ti balitok a medalia ti Filipinas a nangparayray iti moral ti pagilian a dipay nakagun-od iti balitok a medalia sipud nangrugi ti Asian Games idi napan a lawas.
Inungaw ni Obiena ti 5.75-metro a rekord nga imet ni Hapon a Seito Yamamoto idi 2018 Asian Games iti Jakarta.
Namitlo a ginandat ni Obiena a lumagto iti kangato a 6.02-metro tapno marimbawanna ti bukodna a rekord iti Asia a 6.0-metro, ngem saan a nagballigi.
Manipud Kadagiti Agdama a Kameng ti Bannawag: Dios ti Agngina!
Pirak a medalia ti inyalat ni Huang Bokai ti China (5.65m), idinto a gambang a medalia ti inyalat ni Hussain Al Hizam ti Saudi Arabia.
Ni Obiena ti umuna a Filipino a nakastrek iti 2024 Olympic Games iti Paris. (Rey Virgilio Lachica/Manila Bulletin//Lito Hilidon/Bannawag)
