Nangidatag ti Bureau of Customs (BOC) iti uppat a darum nga agricultural smuggling maibusor kadagiti agang-angkat iti bagas nga adda pakainaiganna kadagiti natakuatan a naipuslit a bagas a naidulin iti maysa a bodega iti Bulacan idi Agosto 24.
Segun iti anti-smuggling unit a Bureau Action Team Against Smuggling (BATAS), tallo kadagitoy a kaso ti maibilang a panangsabotahe iti ekonomia (economic sabotage), idinto a ti maysa ket naibaba iti kaso a panaglabsing iti Customs Modernization and Tariff Act (CMTA) gapu ta saanna a nagteng ti PhP10-milion a beddeng.
Kinuna ni Customs Legal Service Acting Director William Balayo a dina mainaganan dagiti naidarum, ngem maragsakanda ta naipilan ti kaso.
Namnamaen ni Balayo a mabigbig koma ti publiko ti panggep ti BOC, nga idauluan ni Commissioner Bienvenido Rubio, a mangparmek iti amin a kita ti panagipuslit, kangrunaan iti bagas.
Manipud Kadagiti Agdama a Kameng ti Bannawag: Dios ti Agngina!
Palpalutpoten pay ti BOC dagiti uppat a bodega nga adda pakainaiganna iti panagipuslit iti bagas; naikkan ketdi dagiti maatap a negosiante a nagispuslit iti gundaway a mangipakneknek a legal ti panagangkatda. (Chino Leyco/Manila Bulletin//Lito Hilidon/Bannawag)
