Iti laksid dagiti dimteng a bagyo ken layus kadagiti kallabes a bulan, umdas pay laeng iti 181% ti bagas iti Ilocos Region, segun iti Department of Agriculture (DA).
Iti maysa a taripnong nga inangay ti Philippine Information Agency-Ilocos Region itay nabiit iti San Fernando City, La Union, kinuna ni DA Ilocos Regional Director Dr. Annie Bares nga umdas ti produksion ti bagas iti rehion para iti daytoy a tawen (2023).
“Manamnama a makapataudtayo iti 1.6 a milion a tonelada metriko a bagas iti daytoy Oktubre wenno Nobiembre, no la ket awanen ti napipigsa a bagyo," kinuna ni Bares.
Itay napan a tawen, nakapataud ti rehion iti agarup 1.9 a milion a tonelada metriko a bagas.
TURISMO: Intayon Idiay Ayuyang Garden iti Pila, Siudad ti Laoag!
Kinuna pay ni Bares nga impraestruktura ti kaaduanna a nadadael kadagiti kallabes a kalamidad, saan a kadagiti mula a pagay wenno mais.
"Iti PhP3.4-bilion a balor ti nadadael iti agrikultura, 55 a porsiento iti daytoy ti impraestruktura wenno dagiti kanal ti irigasion," inlawlawag ni Bares.
Innayonna a mapan a sag-3,000 nga ektaria ti nadadael a mula a pagay ken mais ngem nakarekober met laeng dagiti mannalon babaen kadagiti buffer stocks a bin-i nga inted ti DA isu a nakapagmula manen dagitoy.
Segun pay ken ni Bares, sinuportaran pay ti DA dagiti mannalon babaen kadagiti seedling ken dadduma nga ayuda kas iti fertilizer discount vouchers para iti wet season, dekalidad a bin-i ti pagay (hybrid ken inbred), ken fuel discount vouchers. (Hilda Austria/PNA)
