Natay ti Grade 5 nga estudiante ti Peńafrancia Elementary School iti Antipolo City itay Oktubre 2, sumagmamano nga aldaw kalpasan ti panangtungpa ti maestrana.
Nabigbig ti biktima a ni Francis Jay Gumikib, 14, a na-comatose iti ospital sumagmamano nga aldaw kalpasan a tinungpa ti maestrana iti Filipino idi Septiembre 20.
Segun iti polis, maysa a kaklasean ti biktima ti nagipulong a pinungot ti maestra ti biktima sakbay a linipakna daytoy iti lapayag idi saan a maanawa dagiti kaklasean daytoy.
Intarayda ti ubing iti ospital idi Septiembre 26 gapu ta nakarikna iti nakaro nga ut-ot iti lapayag ken rupana. Na-comatose ti ubing bayat ti kaaddana iti ospital ket pimmusay iti alas-10 ti bigat itay Oktubre 2.
Manipud Kadagiti Agdama a Kameng ti Bannawag: Dios ti Agngina!
Nagkiddaw ni Elena Minggoy nga ina ti biktima ken ni Vice President Sarah Duterte, a daulo ti Department of Education (DepEd) kitaenna koma daytoy a pasamak.
Kinuna ni Antipolo Police Chief Lt. Col. Ryan Manongdo nga ur-urayenda ti resulta ti autopsia nga inwayat ti Crime Laboratory ita (Oktubre 3) tapno maammuan no mabalin a maidarum ti maestra iti kaso a homicide segun iti Republic Act 7610.
Kinuna ni Manongdo nga idi inimtuodda ti maestra, inlibak daytoy a tinungpana iti biktima ket kinunana a tinapikna laeng ti rupa ti ubing.
Segun iti polis, adda 2 a kaeskuela ti biktima a nakakita kano iti panangtungpa ti meastra idi Septiembre 20, ket sidadaanda a mangted iti testimonia iti polis.
Simmarungkar dagiti opisial ti DepEd School Division iti Antipolo City tapno mangiwayat ti bukodda nga imbestigasion. (Nel Andrade/Manila Bulletin//Lito Hilidon/Bannawag.)
