Winaswas ni Presidente Ferdinand Marcos Jr. ita (Oktubre 4) ti Executive Order (EO) No. 39 a nangituding iti presio ti bagas a PhP41 tunggal kilo ti regular milled ken PhP45 tunggal kilo ti well-milled.
Daytoy ti imbatad ni Presidente Marcos iti maysa nga interbiu iti Taguig City, ket kinunana nga agtultuloy latta ti panangtulong ti gobierno kadagiti Filipino nga agkasapulan, nangruna kadagiti mannalon ken kadagiti maapektaran a komunidad.
Naipaulog daytoy a pangngeddeng kalpasan ti rekomendasion ti Department of Agriculture (DA) a waswasen ti EO 39 gapu iti positibo a pagilasinan a naimatanganda bayat ti pannakaipatungpal daytoy idi Septiembre.
Kinuna ni Agriculture Director Gerald Glenn Panganiban a ti lumaklaka a presio ti bagas iti merkado ken ti manamnama a yaadu ti suplay ti bagas gapu iti panagapit dagiti mannalon, ti mangipasimudaag a mabalinen a waswasen ti naituding a presio ti bagas. (Betheena Unite/Manila Bulletin//Lito Hilidon/Bannawag)
