Pinarut ken pinuoran ti Philippine Drug Enforcement Agency (PDEA) ken ti Philippine National Police (PNP) Regional Office-Cordillera ti aganay a PhP9.2-milion ti gatadna a mula a marihuana iti naiwayat a joint operations itay nabiit kadagiti probinsia ti Kalinga ken Mountain Province iti Cordillera Region.
Segun iti PNP Cordillera, agdagup iti 36,055 a pinuon ti marihuana nga aggatad iti mapan a PhP9,298,760 ti naparut manipud iti 6.8 a ektaria a plantasion ti marihuana kadagiti kabambantayan dagiti nasao a probinsia, partikular iti Sagada, Mountain Province ken iti Butbut ken Loccong iti Tinglayan, Kalinga.
Kinuna ni Koronel Carolina Lacuata, chief information officer ti PNP Cordillera, paset ti naisayangkat nga operations ti agtultuloy nga anti-drugs campaign ti gobierno tapno mapukaw dagiti ilegal a maimulmula a marihuana iti kabambatayan ti Cordillera.
“Maitultuloy dagitoy nga operasion ti panangsubli kadagiti dati a luglugar a nakaparutan ti marihuana tapno masigurado a dagiti naimula a marihuana kalpasan ti operasion, saanen a maapit ken mailako kadagiti siudad wenno urban areas,” kinuna pay ni Lacuata. (Liza Agoot/PNA)
