Maysa kadagiti 11 a mangngalap a nakalasat iti panangdungpar ti mapapati a komersial a barko iti Bajo de Masinloc (Scarborough wenno Panatag Shoal) itay Oktubre 2 ti nangibinsabinsa iti napasamak, manipud pannakariknada iti "tribunada" agingga iti pannakakitada iti tanker a nangdungpar iti luganda nga FBB Dearyn.
Iti pannakiuman kadagiti prensa iti hedkuarter ti Philippine Coast Guard (PCG) iti Manila itay Oktubre 5, inlawlawag ni Johnny Manlolo ti napasamak a nakatayan ti kapitan a ni Dexter Laudencia, 47; ken dagiti tripulante a Romeo Mejeco, 38; ken Benedict Olandria, 62.
Segun ken ni Manlolo, idi agarup alas-4:00 ti parbangon ti Oktubre 2, kellaat nga immay ti tribunada, ket apaman a timmakder iti yanna, sumungaden ti barko a nangdungpar iti luganda ket kellaat a napattog daytoy.
Kinuna ni PCG Commandant, Adm. Artemio Abu a palpalutpotenda itan no ti tanker a Pacific Anna a nairehistro iti sidong ti Marshall Islands, ti nangdungpar iti FFB Dearyn.
TURISMO: Intayon Idiay Ayuyang Garden iti Pila, Siudad ti Laoag!
Imparang ni Abu ti maysa a video manipud iti marine traffic monitoring system a mangipakpakita iti ilalabas ti Pacific Anna iti asideg ti FFB Dearyn iti oras ken aldaw a napasamak ti insidente, idinto nga awanen sabali a barko a limmabas idi.
Ti Pacific Anna ket tanker nga agatiddug iti 25-metro ket naggapu iti Incheon, South Korea ket simmanglad iti Singapore itay Oktubre 5. (Martin Sadongdong/Manila Bulletin//Lito Hilidon/Bannawag)
